Lurraldebusen emakidaren gainean "faltsukeriak zabaltzea" egotzi dio PSE-EEk EH Bilduri
Errenteriako PSE-EEk egin du agerraldia, eta Jose Angel Rodriguez idazkari orokorrak eta Isaac Palecia udal politiketako idazkari gisa aritu dira.
Jose Angel Rodriguez eta Isaac Palencia gaurko agerraldian. Lurraldebusen emakidak kapitulu berri bat eman du gaur. Agerraldia egin zuten atzo Bernar Lemos Trafiko eta Garraio zinegotzi eta alkateordeak, eta Maite Gartzia bigarren alkateordeak jakinarazteko Ekialdebusen azken proiektua berrikusteko eskatu diola Errenteriako Udalak Gipuzkoako Foru Aldundiari, eta horretarako errekerimendua aurkeztu. Gaur Errenteriako PSE-EEk egin du gaiaren gaineko agerraldia. Haserre azaldu dira sozialistak; haien iritzirako”faltsukeriak zabaltzen” ari da EH Bildu, “herritarren artean alferrikako egonezina sortzen”.
Gaurko agerraldiari, beste estatus bat eman nahi izan diote, izan ere, deitzailea Errenteriako PSE-EE izan dela eta ez udal taldea nabarmendu dute, “nahiz eta eskutik ari garen lanean”. Jose Angel Rodriguezek hartu du hitza lehenik. Errenteriako PSE-EEren idazkari orokorra, “manipulazioaz” eta “alderdi interesez” hitz egin du eta EH Bilduri egotzi dio “bitarteko publikoak” erabiltzen aritzea “faltsukeriak zabaltzeko”.
E15 autobus linea ez dela desagertuko esan du Rodriguezek, “sozialisten udal taldeak proposatu zuen autobus linea hori 2017an, eta zerbitzu horren jarraikortasun eta hobekuntzaren bermea gara. Ez da linea ezabatuko, harago, asteburuetara zabalduko da. Espero dut hau gertatzen denean gaia manipulatzen ari direnek ardurak hartzea”.
Isaac Palencia Errenteriako PSE-EEren udal politikako idazkari eta sozialisten udal taldearen bozeramaileak bide beretik egin du eta 2022ko ekainetik uztailera zabaldutako alegazioak egiteko epean egin ez izana egotzi dio EH Bilduri: “E15 autobus linea ez da desagertuko, eta alkateak ongi daki, diputatuak berari jakinarazi diolako, baita adierazpen publikoetan esan ere”.
Rodriguezen eta Palenciaren hitzetan, Lurraldebusen emakida berrirako proiektuak Oarsoaldea eta Bidasoaldeko berrantolaketa osoa aurreikusten du, eta “hobekuntza nabarmenak” izango ditu Beraunen: “asteburuan zehar hainbat lineek zerbitzua gehituko dute, tartean, Beraun-ospitaleak (OR07), erdialdea-Ospitaleak (OR08), Unibertistateak (OR10), eta Garbera-Astigarraga (OR06)”.
Bukatzeko, haien ustez “desinformazioa zabaltzen” ari diren EH Bildu eta beste entitate eta norbanakoei jarrera hori eteteko galdegin diete sozialistek.
