Nerabeek internetekin eta kirol apustuekin duten harremanaz ariko dira Pasaiako gurasoak
Treba Gurasoak programaren barruan, bi hitzaldi interesgarri antolatu dituzte martxorako. Lehena 14an izango da, eta bigarrena 21ean.
Etxean nerabeak dituzten gurasoak adi egon daitezela, bi hitzaldi interesgarri antolatu baitituzte datozen asteetarako. Treba Gurasoak programaren barruan, “hezkuntza gaitasunetan trebatuz, haurren eta nerabeen bizi kalitatea eta aukerak hobetzea” helburu duena, pil-pilean dauden bi gai landuko dituzte gurasoekin. Lehenengoan internet eta sare sozialen onurak eta gatazkak aztertuko dituzte, eta bigarrenean, berriz, kirol apustuek eragiten dituzten arazoez ariko dira.
Lehena Internet, pantailak, bideo jokoak, sare sozialak… Onurak eta gatazkak nola kudeatu hitzaldia izango da, martxoaren 14an (osteguna da), 17:30ean, Donibaneko kulturgunean (5. gelan). Rakel Gamitok gidatuko du hitzaldia.
Bigarrena, berriz, martxoaren 21ean izango da, Kirol apustuak eta ausazko jokoak: Zer egin dezake familiak? izeneko hitzaldia emango du Ortzadar-eko kide batek. Ordu beran hasiko dute (17:30ean), eta oraingo honetan Trintxerpeko Udal Euskaltegian izango da.
Hitzaldietan parte hartzeko izena eman beharko da, hitzaldi bakoitzaren data baino 3 egun lehenago, helbide honetara idatzita.
