Pasaiako portuak %5,5eko hazkundearekin itxi du 2023a
%5,5eko hazkundea izan zuen iaz, 3,5 milioi tonako trafikoarekin. Mobilizatutako produktuen artean siderurgikoak (1,8 miloi tona) izan ziren gehien hazi zirenak.
default Pasaiako Portuak 2023ko balorazioa egin berri du. Portuko iturrien arabera, Pasaiakoa izan da 2023an gehien hazi den portuetako bat, %5,5eko hazkundea izan baitzuen iaz. Datuei erreparatuta, 3,5 milioi tonako trafikoa izan zuen aurreko ekitaldian.
Mobilizatutako produktuen artean siderurgikoak (1,8 miloi tona) izan ziren gehien hazi zirenak, mobilizatutako guztiaren %53,1 izan baitzen. Ibilgailuak eta garraio elementuak eta nekazaritza, abeltzaintza eta elikadura trafikoa ere nabarmen igo dira, %14,5 eta %93eko igoera izan dute hurrenez hurren. Gainerako jarduerei dagokionez, mineral ez metalikoen trafikoa ere hazi egin zen izan (%4,7). Aldiz, ongarriak, papera eta zur orea, eta beste produktu energetiko eta kimikoak jaitsi egin dira, baita eraikuntza materialak ere.
Arrantza lonjak ere jaitsiera txikia izan zuen iaz, %2koa 202ko datuekin alderatuta. Guztira, 18.679 tonako saldoa izan zuen.
Urte honetarako “zenbakien egonkortasun orokorra” aurreikusi du portuak, “kaiaren lehiakortasuna mantentzea ahalbidetuko duten aldaketa garrantzitsurik gabe”.
“Errepide eta tren bidezko sarbideak hobetzeko, Lonjako obrak amaitzeko eta kontzesionarioek biltegi berriak egiteko aurreikusitako proiektuak funtsezkoak izango dira dartsenarako eta datozen urteetan zenbakiak sendotu eta hobetu ahal izateko”, adierazi du Pasaia Portuko Agintaritzako zuzendari David Candelariok.
Inbertsioei dagokionez, 2023an zati bat Portu-Hiria ardatzera bideratu zuten, eta agintaritzako iturriek Herrera Mendebaldeko biltegien gainean dagoen plaza berria inauguratu izana nabarmendu dute. Iaz ere Iberdrolaren zentral termiko zaharraren lurzatiaren zolaketa bukatu zutela gogorarazi dute eta Lezo-Errenteriako tren geltokia berritu zela merkantzientzako trenbideen luzera handituz.
Azkenik, erakundeen akordioei dagokionez, Eusko Trenbide Sarearekin (ETS) sinatutakoa nabarmendu dute portuko iturriek. Honi esker, portura trenbide zabalera metrikoa sartzeko obrak egingo dituzte, Eskalerillas ondoko blokeko bizilagunei zuzenean eragiten dien proiektua. Azkenik, jakinarazi dute Pasaiako, Lezoko, Errenteriako eta Donostiako udalei hitzarmen bat sinatzea proposatu diete, “Pasaiako badian erakunde guztien ekintza koordinatzeko lantalde bat berraktibatzeko” asmoz.
