"Genozidioa gelditzeko" exijitu dute oiartzuarrek
Done Eztebe plaza elkartasunez bete dute gaur oiartzuarrek. Gernika-Palestina plataformak deituta, hamarka lagun bildu dira palestinarren kontrako genozidioa salatzeko.
Done Eztebe plaza elkartasunez bete dute gaur oiartzuarrek. Gernika-Palestina plataformak deituta, elkarretaratzea jendetsua egin dute eguerdian Done Eztebe plazan. Aurretik, 11:00etatik aurrera, ingurua aldarrikapenez betetzen aritu dira herritarrak. Gaurko deialdia Bi ordu Palestinarekin egitasmoaren barrukoa izan da.
Lehenik eta behin, palestinarren egoeraz aritu dira. Joan den urriaren 7tik, Israelek 30.000 palestinar hil dituela gogorarazi dute, eta horietatik 10.000 inguru haurrak direla. “Israel 136 haur hiltzen ari da egunero Gazako zerrendan. Hilabetean, 2019az geroztik munduan izandako gatazketan denera hildako haurren kopurua gainditu du Israelgo Estatuak. Gutxi balitz, beste 8.000 gorpu erreskatatu gabe edo desagertuak bezala kontabilizatu dira. 70.000 pertsona inguru zaurituak, gosete arriskua gerra arma moduan erabiltzen ari dira eta beldurra sortzen duen adibide luze batekin jarraitu genezake”, esan dute, amorruz.
Israelek palestinarren kontra hasitako “oldarraldi indiskriminatua justifikaziorik gabeko erasoa” dela erantsi dute, “inoizko larriena, eta nazioarteko zuzenbidearen urraketa nabarmena, egonkortasuna eta segurtasun globala arriskuan jartzen dituena”, taldekoen arabera. Horregatik, “irmotasun osoz” arbuiatu dituzte Israel Gazako zerrendan egiten ari den ekintza militarra.
Genozidioa gelditzeko exijitzeaz gainera, palestinarrei elkartasuna eta estimua adierazi diete gaur bildu diren oiartzuarrek. “Atsekabe sakona” adierazi dute, “biktimengatik eta herritarren alferrikako sufrimenduarengatik”.
Palestinari beharrezko laguntza finantzarioa eta humanitarioa eskaintzeko ere eskatu diote Europar Batasunari, “larrialdiko erantzun humanitarioan ahaleginak areagotu” ditzan, hain zuzen. Horri lotuta, kudeaketa diplomatikoen bidez “deseskalatzea bultzatzeko eta bakeari eusteko ahalegin handiagoa” egin dezala eskatu diote EBri.
“Europako Batasunari, Espainiako Estatuari eta Eusko Jaurlaritzari zein Nafar Gobernuari eskatzen diegu, ahalik eta azkarren antolatzeko, eraso militar horretatik erator daitezkeen errefuxiatuak ahalik eta baldintzarik onenetan hartzeko. Eta harrera espazio bat agintari eskudunen esku jartzeko eskaera egiten dugu, migratzaileei zuzendua, behar izanez gero Palestinatik iristen diren errefuxiatu horiei harrera emateko”, adierazi dute.
Israelen kontrako boikota egiteko ere eskatu dute gaurko mobilizazioan. “Presio neurri gisa”, Israelgo jatorria duten produktuak ez kontsumitzeko deia zabaldu dute, “Palestinako beste eremuen kontrako erasoak bertan behera utzi ditzan, okupazioa bukatu dezan, apartheid sistema eraitsi dezan, eta errefuxiatu palestinarren itzulera eskubidea berma dezan”.
Azkenik, hilaren 17an (igandea da) Donostian Palestinaren alde egingo duten manifestaziora joateko deialdia egin dute gaurkoan.
