Fermiñene, ongizatearen aterpe
Hamarnaka lagun hurbildu dira Fermiñene berriaren ate irekiera ekitaldira eta sortzaileek aurretik eskaini duten ekitaldira.
Ostiralean ate irekien ekitaldia egin zuten. Fermiñene etxeak funtzio berri bat izango du: Gizarte-Ongizate Sailaren eraikin izatea. Hala ere, Oiartzungo Udalak harago joan nahi du, eta “herriko ongizatearen teilatupe” bezala definitu du.
Pasa den ostiralean egin zuten ate irekien ekitaldia. Lehenago, baina, herriko sortzaileek emanaldia eskaini zuten. Ongizatea eta ongi egotea izan zen ardatza, eta hainbat gairi buruz aritu ziren: elkarlanaz, zerbitzuez, hauskortasunaz, konfiantzaz, kohesioaz, arrakalez eta sareez.
Ongizatea “plazara” eraman dutelako bildu zirela gogorarazi zuten, eta Oiartzunen abantaila bat dutela nabarmendu zuten: udalaren eta eragileen arteko elkarlana.
Ate irekien aurretik sortzaileek emanaldia eskaini zuten kontzejupean.
Fermiñenek emango duen ikusgarritasuna nabarmendu zuten jarraian. “Normalean beti egoten dira udaletxeetako gizarte zerbitzuak toki ezkutuetan, ilunpean. Ongi izatea zailtzen duten leku kaxkarretan. Horregatik aldaketa hau ezinbestekoa da, herri duina eta berdinzalea eraikitzen jarraitzeko. Itzalpetik argitasunera pasa dugu gure herriko ongizate zerbitzua”.
Sei solairuko eraikina
Oiartzungo Udalak gogorarazi duenez, azken urteetan Gizarte-Ongizate Sailari bideratutako aurrekontu zatia eta azpiegiturak handitzen joan dira. Orain, Fermiñenerekin, hori gauzatu egingo da.
Bertan kokatuko da orain ongizate saileko lan-talde guztia (bi eremutan banatuta ematen zuten orain arte zerbitzua). Hogei profesionalek osatzen dute taldea, administrari, gizarte langile eta etxez etxeko langileez osatua.
Sei solairu ditu etxeak: harrera (0 solairua); egongela eta terraza (-1); komunak (-2); etxez etxeko zerbitzua (0+); Zaintzadi eta Familia Eskuhartze zerbitzukoetako bulegoak eta bilera gela (1); eta gizarte langileen bulegoak (2).
