Antxoko Musika Astea, beteranoa baina fresko
Igandean hasiko da Antxoko Musika Astea. Goi mailako lau kontzertu jasoko dituzte San Fermin elizak eta pilotaleku zaharrak.
Torrea, Hernandez eta Garcia, gaurko aurkezpenean. 29. edizioa izango du aurtengoa Pasaiako Musika Asteak. Igandean (hilaren 10ean) hasiko da, eta martxoaren 24a izango du itxiera eguna. Bitarte horretan banden, abesbatzen, ganbera orkestren nahiz haize taldeen agertoki bilakatu dira San Fermin eliza nahiz Biteri plazako pilotalekua. Gaur aurkeztu dute astea udalaren partetik Miguel Mari Torrea eta Mikel Garcia gobernukideek, eta Pasaiako Musika Bandaren ordezkari Jose Maria Hernandezek. Izan eren, bandak astearen antolaketaren pisua bere egiten badu ere, Pasaiako Udalaren eta Pasaia Musikalen ezinbesteko laguntza du Antxoko musika zikloak.
Fernandezek aipatu du Musika Asteak ia 30urteko bidea egina duen arren, lehen eguneko ilusioarekin ekin diotela antolaketa lanari, eta irrikaz daudela antxotarren artean musika eta kultura zabaltzeko iniziatiba abia dadila. Horri erantzun dio Garcia Antxoko alkateordeak, esanaz “albiste ona” dela hainbeste urtez gisa horretako kultur jarduera batek indarrean jarraitzea, bai Antxorako zein udalerrirako. Torreak, bere aldetik, adierazi du udalaren egitekoa dela Antxokoa nahiz Pasaian izaten diren bestelako kultur espresioak babestea.
Agerraldiaren testuinguruan, Antxoko Musika Astearen protagonisten gaineko informazioa emateko aukerarik ez du galdu Hernandezek. Ondoko zerrendan, musikarien informazioa haien interbentzioen egunarekin lotuta:
- Hilak 10 (igandean), 13:00etan eta Biteriko pilotalekuan (eguraldi txarrarekin Ibai Ondon), Illunbe Musika Bandaren emanaldia. Fran Berrak zuzenduko du musikarien lagunartea.
- Hilak 16 (larunbata), 20:00etan eta San Fermin elizan, Aquam Lauda abesbatza. Javier Busto hondarribiarra dute zuzendari 2014an sortutako koruko kideek. Emakumeen abesbatza da, eta errepertorio aldetik eklektikotasuna dute mami.
- Hilak 17 (igandea), 19:00etaneta San Fermin elizan, Easo Sinfonietta abesbatza. 2023an sortutako ganbera orkestra gaztea da, Easo abesbatzaren ekosistematik sortua. Lucia Arzallusen zuzendaritzapean ariko dira talentu handiko musika gazteak Antxoko elizan.
- Hilak 24 (igandea), 19:00etan eta San Fermin elizan, Sugaar Ensemble taldea. Haizezko boskote klasikoa da, eta bost tinbre partikular fusionatzeko gai dira errepertorio zainduarekin.
Agerraldian lagun izan dituen udal gobernuko kideei eskerrak eman dizkie Hernandezek agerraldiaren ondarrean, Pasaiako Udala eta Pasaia Musikal beti ondoan eta laguntzeko prest izaten dituztelako. San Fermin elizaren arduradunei ere esker on mezua helarazi diete, instalazioa kontzertuetarako uzteagatik. Nola ez, antxotarrak nahiz pasaitar oro emanaldietara joan daitezela eskatu dute.
