Lizeoan gora eta behera ibiliko da Herbehereetako ikasle talde bat
Bihar 20 ikasle eta 2 irakasle helduko dira gurera, Pasaia-Lezo Lizeoa ikastolak Herbehereetako ikastetxe batekin duen eskola trukearen ondorioz. Astebeteko egonaldia egingo dute.
Urtarrilean izan ziren Herbehereetan Pasaia-Lezo Lizeoko ikasleak. Bihar (hilak 7) Herbehereetako ikasle talde bati harrera egingo diote Pasaia-Lezo Lizeoa ikastolan, Roerdmond-eko (Herbehereak) BC Broekhin ikastetxearekin duen trukearen ondorioz. Astebeteko egonaldia egingo dute gurean, Batxilergoko lehen mailako ikasleen etxeetan hartuko dute ostatu ikasleek. Orotara, 20 ikasle eta 2 irakasle helduko dira.
Pasaiako ikasleak joan den urtarrilean izan ziren Herbehereetan, eta “esperientzia aberasgarria” izan zela diote ikastolako iturriek.
Bihar iritsi bezain laster jasoko dituzte ikasleek, eta ostiralean Lizeora igoko dira autobusez, eta egitarau “bete-betea” izango dute: eraikina ezagutu, oinarrizko euskara eskolak jaso, esku pilota ezagutu eta Donibanera jaitsiko dira, euskal gastronomia ezagutzera bertako ikasleekin batera. Datozen egunetan, aldiz, Bilbon, Aralarren, Iruñean edota Donostian izango dira.
Haien etxeetara itzuli aurretik, gau kulturala egingo dute Juanba Berasategi aretoan. Euren kultura ezagutzeko ikuskizuna izango da.
