Mugaldeko udaleku ibiltaria antolatu dute estreinakoz; Oiartzundik aterako da
DBH 2 eta 3ko gaztetxoentzako mugaldeko udaleku ibiltaria uztailaren 15etik 20ra ibiliko da, Oiartzun, Bortziriak eta Urruña artean.
Gazteek bost gau pasatuko dituzte udalekuetan. Ttur-ttur Euskaltzaleon Bilguneak mugaldeko gaztetxoentzako udaleku ibiltaria antolatu du, estreinakoz. DBH2 eta3ko ikasleei zuzenduta dago, eta uztailaren 15etik 20ra bitartean iraungo du. Oiartzungo Udalaren, Bortzirietako Euskara Mankomunitatearen eta Sarako eta Urruñako Herriko Etxeen laguntzarekin antolatu dituzte udaleku horiek.
Ipar eta Hego Euskal Herriko gazteen arteko loturak estutu nahi dituzte udaleku horiekin, “muga administratiboak gaindituz”. Hainbat balore landu nahi dituzte udaleku ibiltari horietan: “Euskara eta euskalkiak ezagutu eta praktikatzea, parte hartzea bultzatzea, eta natura, kultura eta kirola ardatz hartuaz Euskal Herriko hainbat txoko ezagutzea sustatu nahi dute”.
Sei eguneko udalekuak
Oiartzunen hasiko dira udalekuak, eta Urruñan bukatu. Tartean, beste hiru udalerri bisitatuko dituzte gazteek. Honakoa izango da egitaraua:
- Uztailak 15: eguna Oiartzunen bertan jarduerak eginez.
- Uztailak 16: Oiartzun-Lesaka.
- Uztailak 17: Lesaka-Bera.
- Uztailak 18: Bera-Sara.
- Uztailak 19: Sara-Urruña.
- Uztailak 20: Urruñan egun osoan jarduerak.
Izen-ematea, zabalik
Hiru baldintza bete beharko dira udaleku berri horietan parte hartzeko. Oiartzunen, Bortzirietan, Saran edota Urruñan erroldatua egotea; 2009 edo 2010 urteetan jaioa izatea eta euskaraz jakitea.
Hilaren 29a bitarte eman daiteke izena; online egin beharko da. Toki kopuru mugatua izango da eta gehienez ere 40 gaztek izango dute parte hartzeko aukera.
Udalekuaren prezioa 120 eurokoa dela iragarri dute. Familiek apirilean jakingo dute izen ematea onartua izan den ala ez. Jakinarazi dutenez, antolatzaileak haiekin harremanean jarriko da ordainketa bideratzeko eta behar den dokumentazioa eskatzeko.
