Pasaiako udal langileek greba egingo dute asteartean
Besteak beste, %10eko soldata igoera eskatuko dute, "erosahalmena berreskuratzeko" asmoz. Greba iragartzeko elkarretaratzea egin zuten atzo.
Atzo egin zuten elkarretaratzea udal langileek. Gipuzkoa, Araba eta Bizkaiko langile publikoek astearterako (hilak 12) deitu duten grebara batu dira Pasaiako udal langileak. Orduko mobilizazioa iragartzeko eta egingo dituzten aldarrikapenak azaltzeko elkarretaratzea egin zuten atzo, udaletxe parean.
Langileen batzordeak jakinarazi duenez, zenbait aldarrikapen egingo dituzte greba egunean. Lehenik, Espainiako Estatutik datozen “inposizio eta betorik” ez dutela onartuko esan dute. Horri lotuta, %10eko soldata igoera ere eskatuko dute, “erosahalmena berreskuratzeko” asmoz. Enplegua “sortu eta egonkortzea” ere eskatuko dute asteartean, baita jardunaldiaren murrizketa, “32 orduko lan astearen norabidean”.
Horrez gain, pribatizaziorik ez dutela onartuko adierazi dute hedabideei bidalitako oharrean, “publikoa indartzeko” beharra nabarmenduz. Lan kargak ere arintzeko eskatuko dute, eta langileen osasuna berma dadila. Politika feministak ere eskatuko dituzte, “berdintasun plan erreal eta eraginkorra adostuz”.
Azkenik, lanean euskaraz aritzeko eskubideaz ere aritu dira, hori ere berma dadin exijituko diote udalari.
