Txostekoek erremintako Euskal Ligako finala jokatuko dute larunbatean
Gasteizen izango da finala, eta Oarsoaldeko taldea izango dute arerio: EPLE. Joko Garbin ere bi final jokatuko dituzte.
Txosteko Juaristi, artxiboko argazkian. Txost pilota elkarteko pilotariek hiru final jokatuko dituzte asteburuan. Horietako bi joko garbi modalitatekoak dira, Gipuzkoa mailakoak, eta bestea erremintako Euskal Ligakoa.
Azken hori larunbatean jokatuko dute, Gasteizko Adurtza auzoko pilotalekuan. Oarsoaldeko derbia jokatuko dute. Izan ere, Errenteria-Oreretako EPLEkoak izango dituzte arerio. Larruzko pilotarekin paletaz arituko den bikotea Azpiroz eta Juaristi izango dira. Pala motzean, berriz, Lertxundi eta Argote izango dira Oiartzungo klubaren ordezkariak.
Txost finalean dagoenez, datorren denboraldian Ohorezko Mailan aritzeko txartela eskuratuko du horrela.
Finalak 16:15ean hasiko dira, eta Euskal Pilota Federazioaren Facebook orrialdetik jarraitu ahal izango dira zuzenean.
Joko garbin, txapela ziur
Gipuzkoako Ezker Hormako Joko Garbi Txapelketako finalak Zubietako pilotalekuan jokatuko dira, larunbatean baita ere. 16:00etan hasiko da final sorta. Txostekoak bi finaletan izango dira presente. Gainera, horietako bat klubeko pilotarien artekoa izango da.
Txosteko pilotariek infantiletan eta maila nagusian hartu dute parte, eta bi kasuetan finalera iritsi dira. Honakoak izango dira txapelak erabakiko diren partidak.
- Haur Mailan: Txost 3 (Aranburu – Argarate) — Txost 1 (Gelbentzu – Otxoa de Alaiza).
- Maila nagusian: Txost (Nazabal – Etxeleku) — Zubieta (Aizpurua – Aizpurua).
