Bi manifestazio bihar Martxoaren 8aren harira
Eguerdian manifestazioa egingo dute Ikama gazte antolakundeak deituta; arratsaldean, Oreretako Mugimendu Feministak antolatu du manifestazioa.
Iazko manifestazioaren irudi bat. Martxoaren 8ak aldarrikapena eta festa josiko ditu bihar, badagoelako zer ospatu, baina batez ere, badagoelako zer aldarrikatu eta borrokatu oraindik orain. Zaintza sistema publikoa bermatu eta indarkeria matxista desagerrarazteko aldaketa sakonak aldarrikatuko dituzte biharko protestetan. Izan ere, urratsak egin badira ere, luzea da bidea oraindik, eta aste honetan bertan Errenteria-Oreretan emakume baten kontrako eraso matxistak agerian utzi du beste behin ere.
Palestina eta zehazki bertako emakumeak ere, erdigunean jarriko ditu Emakumeen Nazioarteko Egunak, eta haiei maitasuna eta elkartasuna helarazteko ere baliatuko dute biharkoa.
Bi manifestazio iragarri dituzte. 12:00etan abiatuko da lehena, Herriko Plazatik, Ikama gazte antolakundeak deituta; bigarrena, Oreretako Mugimendu Feministak deitua Herriko Plazatik abiatuko da, 19:00etan. Tartean, auzoetako emakume elkarteek bazkaria egingo dute Merkatuzarren 14:00etan. Urte berezia dute honakoa, 40 urte bete dituztelako, eta 300 emakume inguru izango dira mahaiaren bueltan.
MoreretaON, Orereta eta Oiartzo ikastoletako ikasle eta langileek egiten duten hainbat orduko etengabeko korrikaldia egingo dute bihar. Udal ordezkariak eta herriko kirol zein eragile feministak ere gonbidatuzte parte hartzera. Aurtengo omendua Reyes Carrere izango da, kirol-ibilbide luze eta oparoa izan duen emakumea.
23 Korrikari ere egingo diote keinu, Harro more! lemapean egingo dute lasterketa. Iaz bezala, errioaren bueltan: Gernika eta Agirre Lehendakariaren plazen inguruan.
Bukatzeko, hitzordu nagusia 19:00etan Herriko Plazan. Bertatik abiatuko da Oreretako Mugimendu Feministak deitutako manifestazioa.
