"Politika errealak nahi eta behar ditugu indarkeria matxista ezabatzeko"
Nazkatuta eta amorruak gainezka kalea hartu dute gaur herritarrek, Errenteria-Oreretan emakume bat bortxatu dutela salatzeko
Elkarretaratzea egin dute gaur Errenteria-Oreretan izandako eraso matxista salatzeko. Nazkatuta eta amorruak gainezka kalea hartu dute gaur herritarrek, Errenteria-Oreretan emakume bat bortxatu dutela salatzeko. Herenegun eman zuen eraso matxistaren berri sare sozialen bidez Oreretako Mugimendu Feministak, eta protestara deitu gaurko. Martxoaren 8aren bezperan elkarretaratu dira Herriko Plazan azken eraso matxista salatzeko, eta mahai gainean jartzeko indarkeria matxistaren zama emakumeen biziak itotzen jarraitzen duela.
Erasoen aurrean, bakarra dela irtenbidea aldarrikatu dute enegarrenez bildutakoek: “Autodefentsa feminista; hori da ahalduntze indibidual eta kolektiborako gakoa”. Eta berriro gogorarazi dute ez direla ez biktimak, ezta subjektu pasiboak ere, eta ez direla instituzioetatik bultzatzen diren neurri asistentzialekin konformatzen: “Kontziente gara bidea luzea dela, eta herrian sufritu dugun indarkeria matxista errotik ezabatzeko, polizia eta epaile neurri zigortzaileez gain, bestelako jarrera, ekintza eta neurri behar ditugula”.
Mezu argia, beste behin ere mugimendu feministak gaurko protestan, “politika errealak nahi eta behar ditugu. Ez ditugu nahikoak neurri aringarriak, ezinbestekoa da aurrea hartzeko neurriak indarrean jartzea, eta batez ere, ezarritako ordena aldatzea”.
Elkarretaratzea egin dute gaur Errenteria-Oreretan izandako eraso matxista salatzeko.
Kritiko azaldu da gainera alderdi politikoekin, hauteskunde garaia gertu izanik bere egiten dituztelako diskurtso feministak, “gerora lanketa sakonik egiteko asmo zipitzik ez badute ere. Gaur sentitzen dugun mina eta amorrutik hipokrisiarik ez dugula onartuko oihu egin nahi dugu”. Oharpen bat ere, estu jarraituko dutela instituzioen “koherentzia politikoa”. Azken horren harira, Emakunderi erreferentzia, “ez dugu ahaztu Lehendakaritzatik Emakunde baztertu egin dutela, eragiteko eta ekiteko aukerarik ematen ez duen departamentu baten esku utzita”.
Espazio orotan aske jardun eta ibiltzeko aldarria lau haizetara gaurko protestan, “kalea ere gurea da, gure auzo eta herrietan libre ibili nahi dugu, eraldaketa bidean, emakumeok espazio guztiak hartu behar ditugu, nonahi, noiznahi, nolanahi, bide eta espazio guztietan libreki mugitzeko eskubidea aldarrikatzen dugu”.
“Gure buruaren eta gorputzen jabe”
Nahi ez dutena egiteari utzi nahi diotela ere esan dute gaur, euren buruaren eta gorputzaren jabe direla, eta euren bizi proiektua “aukera askatasunean” oinarrituta eraiki nahi dutela, “hainbeste maite gaituztela esaten diguten erasotzaileei nahikoa dela esan eta baldintzatzaile patriarkalik gabe”.
Eraso bakoitzari erantzuteko konpromiso irmoa egin dute, beste behin ere, “ez gara erasoen aurrean kikilduko ezta isilduko ere. Autodefentsan sakontzen jarraituko dugu, bai indibidualki, bai kolektiboki. Erasotzaileak izen abizenekin ezagutu, gure kaleetatik baztertu, eta kanporatu arte, ez dugu etsiko. Emakume bat erasotzean, denok erasotzen gaituzte. Erasoen aurrean, ekintza zuzena”.
Borroka feministaren aldeko oihuekin eta txalo artean bukatu dute Herriko Plazara bildutakoek elkarretaratzea.
