Koldobike Gezala Txapelketaren finalerdiak, gaur
Pikabea-Dorronsoro eta Lobete-Lozano partidetatik aterako dira bi finalistak. Finalak larunbatean jokatuko dituzte.
Josetxo Etxandi Pilpta Oroitaldiko artxiboko irudia da honakoa. Arkirun Pilota Klubak antolatua, eta Martxoaren 8ko egitarauaren barruan, banakako Koldobike Gezala Esku Pilota Txapelketa egiten ari dira lehenengoz Lezon. Lehiaren barruan 11 pilotari emakumek parte hartu dute, eta gaur da finalerdien txanda: Pikabea-Dorronsoro, eta Lobete-Lozano pilotariek osatu dute finalaurrekoen koadroa. 19:00etan hasiko dira partidak Koldobike Gezala pilotalekuan.
Gaurko partidaren irabazleek zein galtzaileek larunbatean jokatuko dituzte hurrengoak. Izan ere, finala eta 3-4 postuetarako norgehiagokak hilaren 9an jokatuko dira, 19:030ean hasita, Koldobike Gezalan (Bekoerrota kiroldegi ondoko pilotaleku estalia da).
Emakumeentzat propio antolatutako lehen txapelketa da herriko pilotariaren izena daramana. Josetxo Etxandi Pilota Oroitaldiaren barruan ere badago emakumeen txapelketa, baina kasu horretan binakako modalitatean jokatzen dira partidak.
Erraketista profesionala izan zen Koldobike Gezala Sagarzazu (Lezo 1917-2022), eta hari aitortza egiteaz gain, emakumeak pilotaren mundura are gehiago hurbiltzeko iniziatiba da txapelketarena.
