Etxebizitza Sindikatuak bizitoki aterabide bat eskatu du Eskalerillaseko bizilagunentzat
Oarsoaldeko Etxebizitza Sindikatua Pasaiako Portuko Agintaritza organoaren bilerara bertaratu zen atzo Herrera kaleko 10. eta 11. zenbakietako bizilagunentzako bizitoki aterabide batez galdegiteko.
Atzo, Oarsoaldeko Etxebizitza Sindikatuko kideak Pasaiako Portuko Agintaritza organoaren bilerara bertaratu ziren Eskalerillaseko bizilagunentzako bizitoki aterabide batez galdegiteko. Sindikatuak adierazi zuen agintaritza organoak “soberan” dauzkala baliabide ekonomikoak Herrera kaleko 10. eta 11. zenbakietako bizilagunei bizitoki aterabide bat eskaintzeko, baina “ukatu” egiten dela horiek erabiltzera.
Pasaiako Portuak eta instituzio publikoek Eskalerillaseko bizilagunei konponbiderik eskaintzen ez dietela zehaztu zuen sindikatuak. Bizilagunen egoera azken hilabeteetan aldatu ez dela baietsi eta portuaren aldetik aldaketarik antzeman ez dutela nabarmendu zuten. Bien bitartean, “bizilagunek soluziorik gabe” jarraitzen dute, eta ekainaren 30eko data gerturatzen ari dela gaineratu zuten, “ezer lortu gabe”.
Iaz portuak “%5,5eko hazkundea” izan arren, bizilagun gehienei indemnizaziorik eskaintzen ez diela jakinarazi zuten sindikatuko kideek. Oarsoaldeko Etxebizitza Sindikatuaren esanetan, horrek, “eta azken egunetan ezagutu den ustelkeria kasuak ere, ebidentzian utzi du portuak, behin eta berriro, enpresarien irabaziak lehenesten dituela bizilagunen bizi baldintzen gainetik”.
Hori dela eta, sindikatuak Pasaiako Portu Agintaritza organoari eskatu dio “desalojoen ardura beregain” har dezala eta “bizitoki aterabide bat” bila dezala. Egoera konpondu arte, Eskalerillaseko bizilagunak eta Oarsoaldeko Etxebizitza Sindikatuak borrokan jarraituko dute soluzio eske.
