"Guk ez dugu sistema hau zainduko"
Ikama Gazte antolakundeak eta Zirika Neska Gazte taldeak deituta manifestazioa egin dute hamarnaka ikaslek gaur eguerdian; kaleak hartu eta iraultzera deitu dute.
Sistema hau ez dutela zainduko esan dute gaur Ikama eta Zirikak deituta manifestaziora bildu diren emakume gazte eta ikasleek. Mezu argia gaur emakume gazteek zabaldu dutena lau haizetara, ez dutela beraiek sistema hau zainduko, eta lanean ari direla, baita jarraitu ere, “sistema zisheteropatriarkal, kapitalista eta kolonialaren aurrean kikilduko ez garela aldarrikatzeko, sistemari su emateko”.
Borrokarako hamaika arrazoi direla jarri dute lehen lerroan Ikama gazte antolakundeak eta Zirika Neska Gazte taldeak deitutako manifestazioarekin bat egin duten dozenaka ikasle eta gazteek: “Borrokan jarraitzen dugu, emakumeei lan ez ordaindua egitea inposatzea digute eta, ondorioz, besteen bizitzak sostengatzeko ardura esleitzen zaigu. antolaturik jarraitzen dugu, zaintza pribatizatzen jarraituz gero, denok zainduak izateko eskubiderik izango ez dugulako, eta pribatizazioak emakumeok etxeetan egiten duten lana biderkatzea suposatzen duelako. Borrokan jarraitzen dugu, lan ez ordainduaren aitortzarik izan ezean, ezingo delako zaintza ardura kolektibo modura banatu. antolaturik jarraitzen dugu, gizonek lan karga emakumeen gain jartzen duzuelako. Borrokan jarraitzen dugu, zaintza lanen merkantilizazioak batzuen irabaziak eta besteen esplotazioa esan nahi duelako”.
Ikasleak izanik, hezkuntza sistemari begira jarri dira gaurko mobilizazioan, salatzeko, hezkuntza sistemak generoen araberako rolak “betikotzen” dituela, eta ez dituela euren beharrak zaintzen. Konponbidea zein den argi dute ere: “zapaltzen” dituen egoerarekin “kritiko” izaten erakutsi eta “egoera berriak eraikitzeko lanabesak” emango dizkien hezkuntza, “eta hezkuntzak ematen ez badizkigu, guk sortuko ditugu”.
Antolatzen, sareak josten jarraitzeko konpromiso irmoa gaurkoan ere emakume gazteek erakutsi dutena, “egoera sostengaezina delako, eta ez dugulako gure aldarrien jabetza eta eduki hustuketarik onartuko. Horregatik jarraituko dugu feminismotik erresistentziak eta alternatibak eraikitzen, antolatzen eta borrokan”.
