Pilota "emakumeen kirola ere badela" aldarrikatuko dute asteburuan
Etzi eguerdian emakumeen partida profesionalak jokatuko dituzte asteburuan. Oiartzungo Udalak ikustera animatu ditu oiartzuarrak, emakumeena ere badela erakusteko.
Nora Velez del Burgo Feminismo zinegotzia eta Edorta Fernandez Kiroletakoa. Etzi —igandea— emakumeen arteko pilota profesionalak jokatuko dituzte Madalensoron, 12:00etan hasita. Ados Pilota enpresako —emakume profesionalak dituen bakarra— binakako txapelketako partida izango da. Aurretik, pilota eskolakoak arituko dira.
Oiartzungo Udalak herritarrak animatu ditu bertara joan daitezen. Izan ere, gabezia ikusten du udalak. “Maskulinizatutako kirola izan da pilota historikoki. Askoz gehiago dira kirol honetan aritzen diren gizonak emakumeak baino”.
Iaz egin zuten kiroleko diagnosi feministaren ondorioak argiak dira: federatuta dauden 53 pilotari oiartzuarretatik bat bera ere ez da emakumea, eta Pilota Eskolan aritzen diren 50etik, neskak lau bakarrik dira.
Udalak gaineratu duenez, azken urteetan lanketa egin da zifrak parekatze aldera, baina oraindik “bide luzea” egiteke dagoela aitortu dute. Pilota emakumeena ere badela ikusarazi eta kirol hau probatzeko aukera eskaintzeko hainbat ekintza antolatu ditu asteburuan udalak.
Bihar, topaketa
Larunbat goizean pilota topaketa egingo dute Madalensoro kanpoaldean. Pilota modalitate ezberdinak probatu eta lantzeko aukera izango dute LH 5 eta 6ko neskek, hainbat txandatan.
10:00etan LH6koen txanda izango da, eta 11:00etan, 5. mailakoek. Hamabost minutu lehenago geldituko dira Madalensoro kanpoan, eta bertatik abiatuko dira jarduera ezberdinetara. Toki berean bukatuko dute gero ordu bete geroago, 11:00etan (LH 6) eta 12:00etan (LH 5).
Eskola Kirolan parte hartzen dutenez gain, bi ikastetxeetako LH5 eta LH6ko neska denak gonbidatuta dituzte pilota topaketara.
Igandean, partida
Gerriko gorria jantziko dute Andrea Aldaregia latasarra eta Olatz Ruiz de Larramendi eulatearra izango dira. Nafarrek arerio izango dituzte Goiuri Zabaleta leitzarra —hamalau urte besterik ez ditu— eta Irati Zabala lizartzarra.
Partida etzi eguerdian izango da, Madalensoron, 12:00etan hasita. Sarrerak 5 euroan jarriko dituzte salgai, Oiartzungo pilotalekuko txarteldegian. Aurretik —11:00etan hasita— Oiartzungo pilota eskolako haurrek partidak jokatuko dituzte.
