Liderrari ongi eutsi diote OKEko neskek
Eibar Bren kontrako partidan defentsa lan bikaina egin dute oiartzuarrak. Areto futboleko talde nagusiak liderraren kontra galdu zuen haien kantxan.
Oiartzuarrek Eibar Bren bisita jaso zuten larunbat arratsaldean. Oiartzun Kirol Elkarteko emakumeen talde nagusiak liderraren bisita jaso zuen larunbat arratsaldean. Defentsa lan bikaina egin zuten oiartzuarrek, eta puntu bat etxean geratzea lortu zuten areriorik zailenaren aurrean.
Lan serioa egin zuten norgehiagoka osoan zehar, ongi kokatuta egon baitziren zelaian, eta eibartarrei ez zieten aukerak sortzen utzi. Hala ere, oiartzuarrek eurek ez zuten gola usaindu ere egin, eta partida husna bukatu zen.
Mutilek, berriz, Real Union Bren zelaia bisitatu zuten. Fernandezek sartu zuen oiartzuarren gola, partida hasi eta berehala. Hala ere, irundarrek berdinketa lortu zuten. Oiartzuarrek epailearen erabakiei protesta egin zieten, baina partida bana bukatu zen. Lau partida daramate porrota ezagutu gabe.
Areto futbola
Lehen Mailako areto futboleko taldeak Lauburu Ibarraren kantxa bisitatu zuen. Tolosaldekoak mailako liderrak dira, eta oiartzuarrek haiek harrapatzeko aukera zuten.
Partida ongi hasi zen oiartzuarrentzat, hamargarren minutuan aurreratzea lortu baitzuten. Hala ere, Ibarrako taldeak atsedenaldia baino lehen buelta ematea lortu zuen, bi gol sartuta.
Bigarren zatia hasita, ibartarrek beste bi gol sartu zituzten. 4 eta 1eko emaitzak gehiegizkoa zirudien, baina oiartzuarrek azken bost minutuetan erreakzioa lortu zuten, bi gol sartuta. Zoritxarrez, ez zen gehiagorako aukerarik egon.
Miren Tabernak, berriz, erraz irabazi zuen Zarautzen. Bi gol zeramatzaten hamargarren minuturako, baina zarauztarrek aldea txikitzea lortu zuten. Hala ere, aldageletara joan aurretik beste bi gol lortu zituzten oiartzuarrek. Bigarren zatia antzera joan zen, eta beste lau gol gehiago eskuratu zituzten bisitariek.
Emakumeen 3. RFEF Maila
- Oiartzun — Eibar B: 0-0.
Gizonezkoen Ohorezko Erregional Maila
- Real Union B — Oiartzun: 1-1.
Emakumeen Euskal Liga
- Oiartzun B — Leioako Emakumeak: 0-0.
Gizonen Lehen Erregionala. Kopa M-1.
- Oiartzun B — Dunboa Eguzki: 0-2.
Emakumeen Ohorezko Erregional Maila
- Ostadar — Oiartzun C: 8-0.
Mutilen Gazte Mailako Euskal Liga
- Hondarribia — Oiartzun: 4-3.
Mutilen Gazte Mailako Gorengo Maila
- Oiartzun B — Trintxerpe: 1-5.
Mutilen Gazte Maila. Gipuzkoako Kopa: M1.
- Oiartzun C — Amara Berri: 0-3.
ARETO FUTBOLA
Gizonen Gipuzkoako Lehen Maila
- Laburu Ibarra — Oiartzun: 4-3.
Gizonen Gipuzkoako Bigarren Maila
- Zarautz Gran Camping — Miren Taberna OKE: 1-8.
