Txosteko bi bikote, txapeldun Gipuzkoako Joko Garbi Txapelketan
Etxeleku eta Nazabal Nagusien Mailan eta Gelbentzu eta Otxoa de Alaiza Haur Mailan izan dira txapela jantzi dutenak.
Etxeleku eta Nazabal, atzean, txapela jantzita. Gipuzkoako Ezker Hormako Joko Garbi Txapelketako finalak jokatu zituzten pasa den larunbatean, Zubietako pilotalekuan. Lau kategoriatako finalak jokatu zituzten, eta horietako bietan Txosteko ordezkariak zeuden.
Haur Mailako finalari dagokionez, txapela bai ala bai Oiartzunera eramango zuten. Izan ere, herriko klubeko bi bikoteren arteko lehia izan zen Zubietan ikusi ahal izan zena.
Lander Gelbentzuk eta Aiur Otxoa de Alaizak osatutako bikotea izan zen 40 tantora iritsi zena. 36 tantotan utzi zituzten Haritz Aranburu eta Manex Argarate klubeko kideak.
Nagusien Mailan izan zen Oiartzungo pilotariak presente egon ziren beste finala. Peio Etxeleku eta Txomin Nazabal Zubietako bikotearen kontra aritu ziren. Lehia estua izan zen bien artekoa, eta Txostekoak tanto bakarrarengatik nagusitu ziren Josu Aizpurua eta Ugaitz Rezolaren kontra.
Lander Gelbentzu eta Aiur Otxoa de Alaiza, txapelarekin.
