Eskubidean planaren IV. Saio Bateratua egin dute Pasaian
100 haur eta nerabe elkartu dira Pasaiako udaleko ordezkariekin Donibaneko Kulturgunean egin duten Eskubidean planaren IV. Saio Bateratuan.
Donibaneko Kulturgunean egin dute Eskubidean Pasaiako Haur eta Nerabeen eskubideak bermatzeko planaren IV. Saio Bateratua. Pasaiako hiru ikastetxeetako 100 haur eta nerabeek euren kezkak eta beharrak eta ikasturtean zehar landuriko proposamenak partekatu dituzte udal ordezkariekin.
Karmengo Ama, Anuncita eta Pasaia-Lezo Lizeoko 10 eta 16 urte bitarteko gazteak, Pasaiako Udaleko gobernu kide guztiak eta oposizioko alderdietako ordezkariak izan dira saioan.
Solasaldi horretan, besteak beste, garbitasuna, kirola, aisialdirako espazio irekiak nahiz estalpekoak, kultur aniztasuna, jaiak, mugikortasuna, gatazkak bizi dituzten herrialdeekiko elkartasuna edota ingurumenaren zaintza landu dituzte. Proposamen bakoitza irudi baten bidez ilustratu dute, eta gazteen ideiak badia irudikatzen duen mapa batean kokatu dituzte.
Saioaren lehenengo zatia amaituta, taldeak egin dituzte ingurumena, garbitasuna, jaiak eta aisialdiari dagokien gaien inguruan aritzeko.
