Pasaiako bidegorri sarearen "zabarkeria eta utzikeria" salatu du Eguzkik
Pasaia bezalako eremu batek "bidegorri seguru eta egoki bat" behar duela nabarmendu du talde ekologistak, "Gipuzkoako Bizikleta Bideen Lurralde Plan Sektorialak aurreikusten duen moduan".
Aste honetan hasi dituzte Lezo eta Pasaia lotzen dituen bidegorriaren azken faseko lanak. Aspalditik proiektuaren atzerapenak salatzen eta trazatua hobetzeko proposamenak egiten aritu da Eguzki talde ekologista. Obrak hasi direla probestuz, zenbait kontu argitu nahi izan dituzte, eta eskera zehatzak egin.
Lehenik eta behin herritarrek aspalditik eskatutako proiektua dela gogorarazi dute, “bi pertsona gurutzatzen diren bakoitzean errepidea inbaditu behar izateak dakarren arriskuagatik”. Dena den, herritarren eskaerak ez dituztela aintzat hartu salatu dute eta plana “behin eta berriz urratu” duela, “arreta desbideratuz eta hainbat aitzakia erabiliz”.
“Utzikeriazko” egoera horrek herritarrengan “abandonu sentsazioa” eragin duela diote, “kasu honetan aldundiaren aldetik. Izan ere, beste batzuetan denbora eta dirua beste obra faraoniko batzuetan inbertitzera ohituta dago, eta, aldiz, egunerokoan eragiten diguten gai horiekin, beren esku hartzea luzatu egiten da denboran eta, ekonomiari dagokionez, ahalik eta baliabide gutxien erabiltzen ditu, hala nola, Pasaiako saneamenduarekin”, esan dute.
Badiako bidegorri sarearen gaineko jarduketa obra honekin bukatzen ez dela erantsi dute. Pasaia bezalako eremu batek “bidegorri seguru eta egoki bat” behar duela nabarmendu dute, “Gipuzkoako Bizikleta Bideen Lurralde Plan Sektorialak aurreikusten duen moduan”.
Plan honetan jasotzen denez, sekzioaren zabalerak 4 metrokoa izan beharko luke txirrindulariak eta oinezkoak batera egoteko bidea bada eta azken horien dentsitatea handia bada: “hara non Lezo eta Pasai Antxo arteko espaloia bidegorri gisa katalogatuta dagoen bizikletentzat eta oinezkoentzat, nahiz eta punturen batean galtzadaren zabalera 1,40 metrotik beherakoa izan. Eta bidegorri katalogazio hori gauetik goizera egiten da trazadura konpontzeko edo zaharberritzeko inolako obrarik gabe, informazio kartel batzuk jarrita soilik”, erantsi dute, amorruz.
Kasu honetan ere “zabarkeria, utzikeria eta bizikletek eta ibiltariek egunero erabiltzen dituzten azpiegituretan inbertitzeko gogo urria” errepikatzen dela esan dute azkenik. Lezo eta Pasai Antxoko zati horri dagokionez, zabalerak oinezkoak eta bizikletak batera ibiltzeko baldintzarik betetzen ez duenez, oinezkoen erabilera lehenetsi behar dela uste dute, eta “baldintzak hobetu”.
