Pasaiarekin duen konpromisoa berretsi du aldundiak
Bilera izan berri dute Teo Alberro Pasaiako alkateak eta Azahara Dominguez diputatuak. Besteak beste, portuaz, Lurraldebusez eta Pasaia Itsas Festibalaz aritu dira.
Dominguez eta Alberro. Teo Alberro Pasaiako alkateak eta Azahara Dominguez diputatuak bilera egin berri dute, bi erakundeei eragiten dieten gaiak aztertzeko. Bilera honetan, besteak beste, herriaren eta portuaren arteko harremanaz, Lurraldebus zerbitzuaz, motoraren integrazioaz Mugi sisteman edo Pasaia Itsas Festibalaz aritu dira.
Lehenik eta behin, Gipuzkoako Foru Aldundiko Mugikortasuneko, Turismoko eta Lurralde Antolaketako departamentuak Pasaiako Udalarekiko konpromisoa berretsi du. Alkateak “Pasaia biziberritzeko konpromisoari eusteko” eskatu dio Dominguezi. Hain zuzen, herritarren erabilerarako portuko espazioen mantentze lanen finantzaketan inplikatzeko eskatu dio. Diputatuak jakinarazi dio udalari zuzendutako aurrekontu partida bat dagoela gune horiek mantentzeko lanak diruz laguntzeko, udalak eta Portu Agintaritzak sinatutako hitzarmenaren arabera. Honi esker, mantentze lanen eta kontserbazioaren gastuei aurre egin ahal izango dio udalak.
Badiaren hiri berrorenatze integraleko jarduketei dagokionez, alkateak eskatu du “orain arte bezala manten dezala departamentuaren inplikazioa, diru laguntza funtsezkoa baita Pasaia herri kohesionatua, modernoa eta iraunkorra izan dadin”. Horretarako konpromisoa ere hartu du diputatuak. Bestalde, Dominguez prest agertu da portuko ingurumenaren jarraipenerako batzordean parte hartzeko.
Mugikortasunari dagokionez, motora Mugi sisteman sartu izana txalotu dute bi ordezkariek, eta beharrezko jarraipen lanak egitea erabaki dute bi aldeek. Lurraldebus zerbitzuaz aritzean, proiektu aldatuari dagokionez, alkateak “kezka” agertu du eta diputatuak adierazi du, behin zerbitzua martxan jarrita, “beharrezko doikuntzak eta aldaketak” egingo dituztela.
Azkenik, maiatzean helduko den Pasaia Itsas Festibalaz ere aritu dira bi ordezkariak. Dominguezek aipatu du festibalak irauten duen bitartean lineako autobusen maiztasuna indartuko dutela. Bukatzeko, agindutako finantzazioa bermatuko diola ziurtatu du diputatuak.
