Musika elektronikoaren zaleek dantzan jarriko dute berriro Juanba Berasategi aretoa
Bigarren Oarsoaldeko Elektronika Topaketa antolatu dute apirilaren 6rako. Bigarren edizio honetan ere "techno generoari merezi duen lekua" emango diote.
Lehen edizioko irudiak dira. Techno musikaren zaleek hitzordu garrantzitsua izango dute datorren apirilaren 6an (larunbata da). Xantixa Kultur Elkarteak, Oarso Groove taldeak eta udalak antolatuta, bigarren Oarsoaldeko Elektronika Topaketa egingo dute Donibaneko Juanba Berasategi aretoan. Sei artistek dantzan jarriko dituzte bertaratutako guztiak. Bigarren honetan ere “techno generoari merezi duen lekua” eman nahi diote antolatzaileek: “musika genero honek, atmosfera eta kultura propioa ditu atzetik. Bertan murgiltzeko aukera izango dugu eta Detroiten hasi eta mundu osora zabaldu den generoaz ikasi eta gozatzeko baita ere”, esan dute antolatzaileek.
18:00etan hasiko da topaketa. Unai Bellamy-rekin (@surco41) motorrak berotzen hasiko dira herritarrak, bere bildumako biniloekin. Ondoren, 19:00ak aldera, solasaldia izango da gonbidatu bereziekin. Elkarrizketak egingo dizkietela aurreratu dute antolatzaileek, “beraien bizipen eta musikaz gozatzeko modua hobeto ulertzeko” asmoz.
20:00etan emango diote hasiera gaueko festari. Markinson (@m.markinson) igoko da oholtzara eta gonbidatuei sarrera emango die honek. Ondoren, gonbidatu berezien txanda helduko da, “biniloetan plasmaturiko arteaz” gozatzeko aukera izango da. Jarraian, Manu Etxarri (@manuetxarri) ariko da “estilo grooveraroarekin”, eta ondoren, Ander Garayar (@edf_andergarem) igoko da oholtzara, 2:00ak arte.
Iaz, lehen edizioan, elkarrizketa egin zien antolatzaileei HITZAk. Hemen irakur daiteke osorik.
