OKEren taldeentzako hasi da udaberria
Oiartzun Kirol Elkarteko talde nagusiek puntuak lortu dituzte asteburuan. Hiru garaipen eta berdinketa bat lortu dituzte oiartzuarrek.
Udaberria etzi goizaldean hasiko da, baina Oiartzun Kirol Elkarteko talde nagusiei lehenago loratu zaie. Izan ere, talde guztiek puntuak lortu dituzte asteburuan jokatutako partidetan.
Lehenak jokatzen areto futboleko taldeak izan ziren, ostiral arratsean. Lehen Mailako taldeak Oarsoaldeko derbia jokatu zuen Lezoko Bekoerrota kiroldegian, Gaintxuren kontra.
Lehenengo zatia nahiko berdindua joan zen, baina oiartzuarrek aurreratzea lortu zuten. Bigarren zatiaren hasieran golak bata bestearen atzetik etorri ziren, eta 0-4 aurreratu ziren. Lezoarrak esnatu ziren, eta beste hiru gol sartu zituzten, baina ez zen nahikoa izan puntuak etxean gera zitezen. Oiartzuarrek, beraz, hiru puntuak poltsikoratu zituzten.
![monte oiartzun 2024](https://oarsoaldea.hitza.eus/site/files/2024/03/whatsapp-image-2024-03-17-at-18-56-18-500x313.jpeg)
Miren Taberna-Mondrate, ostiralean.
Bigarren Mailan, Miren Tabernak Mondrateren bisita jaso zuen. Lehenengo zatian oiartzuarrak nagusi izan ziren, baina ez zen golik izan. Bigarren zatian nagusitasunak bere fruitua eman zuen, eta hiru gol sartu zituzten Elorsorokoek. Arrasatearrek ohorearen gola erdietsi zuten partidaren bukaeran.
Futbolean, lau puntu
Emakumeen talde nagusiak Kantabriara txangoa egin du asteburuan, Monteren etxera. Etxekoek lehenengo hamar minutuetan ongi eutsi zioten bisitariei, baina, mendiak margaritak jasotzen dituenaren moduan, golak bata bestearen atzetik pilatu zituzten oiartzuarrek.
Nahia, Lizaso eta Rebecca —azken horrek hat-trick bat lortu zuen— izan ziren golegileak. Bosgarren postuan jarraitzen dute oiartzuarrek, baina orain laugarrenekin —Mulierrekin— berdinduta daude, 44na punturekin.
Gizonek, berriz, berdindu egin zuten, etxean. Tolosaren kontra aritu ziren, eta hasieratik oso lehiatua izan zen partida, eta bi taldeek izan zituzten aukerak. Ez zuten batzuek ez besteek asmatu, eta markagailuak erakutsi zuen husnako emaitza —bi eguzkiren modukoak— izan zen bidezkoena.
Emakumeen 3. RFEF Maila
- Monte — Oiartzun: 0-5.
Gizonezkoen Ohorezko Erregional Maila
- Oiartzun — Tolosa: 0-0.
Emakumeen Euskal Liga
- Alaves B — Oiartzun B: 5-0.
Gizonen Lehen Erregionala. Kopa M-1.
- Landetxa — Oiartzun B : 1-1.
Emakumeen Ohorezko Erregional Maila
- Oiartzun C — Tolosa B: 0-1.
Mutilen Gazte Mailako Euskal Liga
- Oiartzun — Arrupe Chaminade: 1-5.
Mutilen Gazte Mailako Gorengo Maila
- Hondarribia B — Oiartzun B: 2-1.
Mutilen Gazte Mailako Lehen Maila. Kopa M-1.
- Mariño B — Oiartzun C: 1-4.
ARETO FUTBOLA
Gizonen Gipuzkoako Lehen Maila
- Gaintxu — Oiartzun: 3-4.
Gizonen Gipuzkoako Bigarren Maila
- Miren Taberna — Mondrate: 3-1.