Oporrak Bakean egitasmoa plazara aterako dute ostiralean
Haur errefuxiatu sahararren harrera programa dibulgatuko dute, haima, musika eta hitzaldi baten bidez. Erakusketa jarriko dute.
El Watanek ostiralean aterako du berriro haima [Arg.: Oiartzungo Udala]. El Watan elkarteak Oporrak Bakean programa sustatuko du datorren ostiralean, hilak 22. Egitasmo horrek haur sahararrak uda basamortutik eta kanpalekutatik kanpo pasatzeko aukera ematen du. “Uda bateko besarkada” izango da aurtengo kanpainaren leloa.
16:30ean haima jarriko dute Done Eztebe plazan, eta musikaz girotuko dute arratsaldea, 20:00ak arte. Helburua izango da Oiartzungo familiei programari buruzko informazioa helaraztea, udaran Saharako haur baten harrera familia izan daitezen, haurra “besarka” dezaten.
Gainera, 19:00etatik aurrera, Hassanna Alia saharar aktibistak hitzaldia emango du udaletxeko areto nagusian.
Erakusketa, aste honetan
Bestalde, gaurtik aurrera, eta igandera arte, Moloud artistaren margoen erakusketa ikusteko aukera izango da.
Udaletxeko areto nagusian ikusi ahal izango dira koadroak.
