Harro egin zuten, egiten ari dira, eta egingo dute euskaraz
Dinokorrika edo adinekoen Korrika egin dute gaur Lezon. Gazte ez izan arren, euskararen aldeko jarrera irmoa azaldu dute partaideek.
“Indarrek laguntzen gaituzten arte, euskararekiko dugun harrotasuna lau haizetara zabaltzen jarraituko dugu”. Gaur egin dute Lezon Dinokorrika edo adinekoen Korrika. Bidegorrian hasi dute bidea, eta Gurutze Santuaren plazaraino joan dira pankarta, musika, peto, aldarri eta lekukoarekin. Han, bukaeran, esan dute testuhonen hasierako esaldia garai batean gazte izandakoek. “Harro herri! XXI. mendera iritsi gara, eta euskararekiko sentitzen dugun harrotasuna plazaratu eta herria girotu nahi dugu”, baietsi dute.
Ostegunero egiten den Tipi-Topa ibilbidea, gaur, 23. Korrikarena izan da. Euskal komunitatearen parte sentitzen dira adinekoak. Hori gaur ere demostratu dute. Esan dute lan isil eta anonimoarekin saiatu direla euskararen transmisioan eragiten eta euskaldun izateak dituen balioak euren ondorengoei azaltzen, “oztopo guztiei aurre egin diegu”. Belaunaldi berrietan, ondorengoengan jarri dute fokua plazako hizketaldian, eta esan dute nahiko luketela adinez gazte diren horiek euskararen lekukoa, euskaldun izatearen harrotasun eta konpromisoa hartzea.
Dinokorrikaren eta hitzaldiaren ondoren salda hartu dute herriko adinekoek. Plazako itzalean eserita izan diren bitartean hartaz eta hontaz hizketan izan dira. Euskaraz.
Jarraian Dinokorrikaren hainbat uneren bideoa, eta argazki sorta.
Gaur (osteguna)
- 11:30ean, Donibanetik Lezora (termika zenetik herrira), Dinokorrika (adinekoen Korrika).
- 18:30ean, Gezala Auditoriumean, Oihaletxea dokumentalaren proiekzioa Lander Garro zuzendaria bertan dela.
Bihar (hilak 22, ostirala)
- 12:15ean, Pasaia-Lezo Lizeoaren Donibaneko egoitza nagusitik abiatuko da Korrika Gaztea Lezorantz. Eskualdeko 3. zutabea da.
- 15:30ean, Goiko Plazan hasita, Korrika Txikia. Lezo zeharkatu ondoren Karlos Saldise plazan bukatuko dute bidea. Askaria izango dute han gaztetxoek.
Etzi (hilak 23, larunbata). 23. Korrika Lezora iritsiko da
- 14:00etan, herri bazkaria Karlos Saldise plazan. Txartelak Oroitzene AEKn eskura daitezke, baita 607 59 88 71 telefono zenbakira deituta ere. Helduen menua: 17 euro; haurrena: 7 euro. Menu barazkijalea ere badago.
- 16:00etan, bingo musikatua Karlos Saldisen.
- 17:00etan, Goiko plazan, kuadrillen arteko sokatira txapelketa (16 urtetik gorakoentzat). Bitarte horretan haurrentzako herri jolasak izango dira. Kuadrillen sokatira txapelketan izena emateko 626 14 66 39 telefono zenbakira deitu behar da (gutxienez sei kideko taldeak).
- 18:00. Elektrotxarangaren irteera herritik.
- 20:00etan, afari merienda Saldisen.
- 20:30ean, berriz ere elektrotxarangaren irteera.
- 21:30ean, Txirbilla Sound System.
- 23:36an, 23. Korrika Lezora iritsiko da.
- 00:00-02:00, DJ Kalimoustro Lezon.
Martxoak 24 (igandea). 23. Korrikaren bukaerako festa Baionan.
- Baionako bukaera ekitaldietara joateko autobusa antolatu da. 09:30ean aterako da Sotxo paretik. Autobuseko txartelak Oroitzene AEKn daude salgai, 15 euroan.
