Motxian Eby bideo erronka lehiaketak baditu irabazleak
Oarsoaldea Garapen Agentziako Euskara Batzordeak antolatzen du egitasmoa. Lehenengo erronka Oiartzungo Ranitak taldearentzat izan zen, eta bigarrenean Errenteria-Oreretako Erramundarrak taldea nagusitu da.
Bukatu da aurtengo Motxian Eby, gazteei begirako bideo erronka lehiaketa. Oarsoaldea Garapen Agentziako Euskara Batzordeak antolatzen du egitasmoa, eta adierazi dute gazteak “gustura” aritu direla Julen Castrillo zirikatzailearen gidaritzapean.
Lehenengo erronkaren irabazlea Oiartzungo Ranitak taldea izan zen. Bigarren erronkan, aldiz, Errenteria-Oreretako Erramundarrak taldearen bideoa saritu dute. Aipatutako bi taldeek 150 euroko sari bana irabazi dute.
Azkenik, antolatzaileek jakinarazi dute aurtengo ekitaldian ez dela sari nagusirik eman, lau lan berdinduta geratu baitira. Ordainsari hori lau lanen egile diren taldeen artean banatuko dutela baietsi dute. Bideo parte hartzaileak Motxian Eby egitasmoaren webgunean ikus daitezke.
Oarsoaldea Garapen Agentziak irabazleak zoriondu eta eskerrik “beroenak” helarazi dizkie parte hartzaile guztiei.
