Petoak, gogoa eta elkartasuna prest
23. Korrika iritsi aurreko goiz ederra Oiartzunen. Petoen banaketak monopolizatu du goiza, baina izan dira jarduera gehiago.
Oiartzunen lekukoa eramango dutenen talde argazkia. Oiartzungo Korrika Batzordeak adar askoko jarduerak proposatu dizkie oiartzuarrei gaurko egun handiaren aurretik. Orotarikoak izan dira. Gaurko eguna horien guztien burutze ariketa kolektiboa izango da, herriko erdialdean nolabait jada irudikatu dena: Oiartzunen lekukoak eramango dituztenek euren petoak jaso dituzte. Historia egiteko txalekotxoak dira, betirako gordeko diren horietakoak. Emozioa nabaria da herrian.
Hori baino lehenago, ordea, nafarrek esaten duten bezala hainbat momentiko izan dira. Lehena, Bretainiako Karaez herriko kideei udaletxean egindako harrera. Senidetuta daude Oiartzun eta Karaez, aspaldiko harremana dute. Esan daiteke gaurkoa joan-etorrian den elkartasun ariketa baten jarraipeneko bat-egitea izan dela. Izan ere, oiartzuarrek Korrikaren helburu berberak dituen eta aurtengo maiatzaren 17tik 25ra egitekoa den Redadeg herri lasterketa erraldoian parte hartzeko asmoa dute (Redadegen aurreko edizioetan ere lekuko eramaile izan dira), bretoieraren alde egiten den lasterketa kolektiboan aletxoa jarriko dute oiartzuarrek, alegia: Korrikaren ahizpa txikia da. Hala, gaurko bisitan, bi herrien arteko loturak estutzeaz gainera, joan-etorriko horretarako zitatu dira. Lehen urratsak, gaurkoak (beno, biharkoak, 00:27an iritsiko baita 23. Korrika Oiartzunera). Hurrenak Bretainiakoak maiatzaren 17tik 25era.
Beste unetxo edo momentiko bat. Haurtzaro Ikastolako ikasleek hainbat gairen salmentarako eta pintxoak saltzeko postuak jarri dituzte. Helburua: Beskoitzeko (Lapurdi) ikastola laguntzeko dirua biltzea. Asko izan dira Haurtzaroko ikasle lanpetu eta elkartasunez beteen mahaietara hurbildu direnak era batera edo bestera laguntzera. Herritarren erabakia: tortilla pintxoak eta bizkotxoak, bikainak! Eta elkartasun ekintza are bikainagoa. “Beskoitzeko ikastolarekin elkartasuna. Ez zaituzteGU bakarrik utziko”, idatzi dute ikasleek postuen atzeko pankartan.
Unetxoekin jarraituz. Goizeko ekitaldiak Oarsoaldea Garapen Agentziak abiatutako Euskararen Paparazziak sariketaren Oiartzungo zatia emateko baliatu dira. Urrats paper-dendakoek irabazi dute saria, euren erakusleihoaren euskarazko euskarrien irudia jasota zuena izan baita argazkirik onena. Komertzioko Larraitzek eta Itxarok jaso dute saria, Ttur-Ttur Euskaltzaleon Bilguneko Aitzol Perez San Romanen eskutik.
Izan dira dultzaineroak, mutxikoak, plaza giroa onoro har. Baina goizaren epizentroa Kontzejupeko banaketa izan da: banan-banan jaso dituzte dagozkien petoak (datua: eskualdeko herrietan AEK-ko kideek zituzten peto guztiak saldu dira, agortu egin dira; petoren bat lortzeko Korrikaren aurretik datorren Petoneta-ra zain egon beharko da) 23. Korrikarekin zuzen-zuzenean bat egin duten talde, elkarte eta eragileetako kideek. Ondoren, harro eta oso ordenatuta, talde argazkia atera dute. Emozioa, ezinegona, zirrara. Gutxiago falta da 23. Korrika herrian izateko.
Beheko koadro urdinskan gaur oraindik egiteko dauden ekitaldien zerrenda ageri da. Jarraian, Aitziber Arnaizek HITZAri erraztu dion argazki sorta bikaina (argazki gehiago hemen klik eginda). Gainera, bihar (igandea) goizean zehar Oiartzunen lekukoak eraman dituztenen argazki guzti-guztiak ezarriko ditu HITZAk webgune honetan. Beraz, gozatu Korrikaz, eta izan harro euskaraz!
23. Korrika. Oiartzungo gaurko (larunbata) egitaraua.
- 18:30. Pirritx, Porrotx eta Marimototsen pagoaren landaketa, Arizmendin.
- 19:30. June Galardiren kantaldia.
- 22:30. DJ Txillardegi. Afari autogestionatua.
- 00:15. Beroketa gidatua, Luix Mitxelenarekin.
- 00:27. Korrikaren iritsiera, Arraguan.
- Korrika pasatzean. DJ Txillardegik pintxatzen jarraituko du.
