[Irudiekin] Gustuko tokian, aldapa... batzuk bai
Korrika Txikia egin dute Elizalde Herri Eskolako eta Haurtzaro Ikastolako ikasleek, Elizalde, Ugaldetxo, Iturriotz eta Altzibar lotuz.
Ehunka ikasle bildu ditu Korrika Txikiak. Artean lainoaren arrastorik ez zen, eta eguraldi zoragarri batekin egin ahal izan dute Korrika Txikia Oiartzunen. Elizalde Herri Eskolako eta Haurtzaro Ikastolako ikasleak batzen dituen tokitik atera da Beheko Plazako biribilgunean.
Eskuz esku pasatu dute lekukoa. Hasieran eskolta ederra osatu dute gurasoek, erritmo bizian zihoazen ikasleen segizioa babestuz. Bitartean, furgonetaren bozgorailuetatik Korrikako abestien Top23a entzun zitekeen.
Ugaldetxorako bidea hartu dute, ziztu bizian joanda, eta bidearen aldapa apetatsuekin jolasean ibili dira: aldapan behera bizi, aldapan gora nekez.
Matteoko bihurgunera iritsita hasi da ordeka. Momentu batzuetan korrikalari —ez hain— txikiek gasolindegiko ondoko 70 kilometro orduko abiada gainditu dutela iruditu du. Geldialdiak egin behar izan ditu bidea urratzen ari zen furgonetak, hauspoari buelta emateko. Bide batez, gurasoen hasierako ausardia ia ezerezean geratu da Altzibarrera bidegorritik —Iturrioztik sartuta— iritsi denerako.
Eta hortik, gora, berriro, plazara. Furgonetaren motorrak korrikalariek baino gehiago sufritu du. Eta horrela iritsi dira plazara, azken metroetan estutuz, txokolateak eta bizkotxoak zain zituztelako.
