Gazteenek ere zirrara barruan dute
Atzoko Korrika Txikiaren ondoren, hainbat jarduera egin eta bizi izan zituzten gazte oiartzuarrek. Ondoko irudi sortan, horien laburpena.
Atzoko Korrika Txikiaren ondoren, 23. Korrika girotzeko jarduerek ez zuten etenik izan. Herriko malda gehientsuenak igo eta jaitsi ondoren, bai Done Eztebe plazan zein Landetxekoan herriko ikasleek eskola orduz kanpo egiten dituzten ekintzen erakustaldia burutu zuten. Orduan oraindik ere ateri zen. Musika, dantza eta poza. Korrikaren zirrara eurena dute gazteenek
Gazte-gazteen ondoren, ez hain txikitxo direnen txanda iritsi zen. Korrika Gaztearena. Lehenik eta behin, bi ariketa egin zituzten. Lehena herria apaintzearena, euren mezu eta aldarriekin. Bigarrena fisikoagoa, Uxuek, Garazik eta Malenek gidatutako beroketa saioa egin zutelako Kontzejupean. Giharrak punttuan jarrita, eurixkarekin eman zioten bira gazteek herriaren kaskoari, mezu argi bat gailendu zelarik: Ipar Euskal Herrian baxoa eta brebeta azterketak euskaraz izan daitezenaren desioa eraman zuten herritik Euskal Herriko ikasle haienganaino. Biraren ondoren, mezuaren irakurketa, eta askaria. Perfekto. Denak harro.
Gaur da egun handia. Korrika hitzaren ondoan ez da gazte, txiki, kultural edo bestelakorik jarriko. Korrika iritsiko da gaur (beno, bihar goiz-goiz, gaur-bihar arteko 00:27an Arraguara). AEKren eta euskararen sostengurako martxa ibiltari erraldoiak zirrara eragingo du beste behin herrian. Beteranoenek badakite zer den hori; gazteek ere badute, gutxiagotan bizi izan arren. Emozioaren eguna da gaurkoa.
Jarraian ikus daitekeen argazki sorta Aitziber Arnaizek egindako irudiei esker landu ahal izan du HITZAk. Hark irudi eta bideo gehiago batu zituen atzo, ondoko estekara sartuta osoki ikus daitezkeenak.
23. Korrika. Gaurko (larunbata) egitaraua.
- 11:00. Dultzaineroak.
- 12:00. Mutxikoak.
- 13:00. Argazki ofiziala lekuko eramaileekin.
- 16:30. Zirku tailerra. Bitartean, puzzlea margotzea eta murala osatzea.
- 18:30. Pirritx, Porrotx eta Marimototsen pagoaren landaketa, Arizmendin.
- 19:30. June Galardiren kantaldia.
- 22:30. DJ Txillardegi. Afari autogestionatua.
- 00:15. Beroketa gidatua, Luix Mitxelenarekin.
- 00:27. Korrikaren iritsiera, Arraguan.
- Korrika pasatzean. DJ Txillardegik pintxatzen jarraituko du.
