Meategiak, trikuharriak eta saroiak ezagutzeko parada, larunbatean
Arditurriko meategiak eta Hernaniko trikuharri zein saroien berri izateko aukera eskaintzen du jarduerak. Familientzat ere prestatu dituzte ekintzak.
Akolako trikuharria. Gipuzkoako hainbat parketxek egitarau berezia antolatu dute Aste Santurako eta Pazko asterako, eta horien artean aurkitzen da Oiartzungo Arditurri parketxea.
Martxoaren 30erako egin dute deialdia, eta Arditurri parketxeko meategiak ezagutzeko aukera emango dute batetik, eta Hernaniko trikuharri eta saroien berri izateko irteera antolatu dute bestetik. Luis Mari Zaldua izango da bisitaren arduradun, eta inguruneari nahiz lekuko toponimiari buruzko xehetasunak emateaz gain, Gipuzkoa mailan “ondoen” kontserbatu diren saroiak ikusi eta hainbat trikuharri ezagutzea ahalbidetuko duen bideetan murgilduko dira bisitariak.
Gipuzkoan baliabide eta aztarna “interesgarriak” daude, eta hain zuzen horiek ezagutzea dute helburu ekintza horiek.
Proposamen horietaz gain, familientzat prestaturiko ekintza baten berri ere eman dute. Orientazio hastapenak, natura eta aisia uztartzeko aukera ematen du ekintza honek, eta Arditurriko meatzaritza pasaietan barrena izango da. Ekintza honen hasieran orientazio oinarri batzuk ulertu eta barneratuko dituzte parte hartzaileek gero pista eta arrasto batzuei jarraituz ibilbidea burutzeko baliagarriak izango zaizkienak.
Informazio gehiago behar duenak, 943 495 069 edo 688 895 068 telefono zenbakietara dei dezake, edo e-posta bidez harremanetan jarri.
