Errenta aitorpena euskaraz egitera animatu dute Oarsoaldeko udalek
Laster hasiko da 2023ko errentak aitortzeko kanpaina. Euskaraz egiten dutenen artean otordu bat zozkatuko dute.
Errenta aitorpena euskaraz egiteko deia, aurten, Oiartzundik egin dute. Apirilean hasiko da errenta aitorpenaren kanpaina. Kanpaina ahazteko hiru data zehaztu ditu Gipuzkoako Foru Ogasunak, motaren arabera:
- Proposamenak onartzea: Apirilaren 8an.
- Internet: Apirilaren 11n.
- Mekanizatua: Apirilaren 16an.
Horren harira, urtero bezala, Oarsoaldeko udalek, zergadunak animatu dituzte, errenta aitorpena euskaraz egin dezaten. Gipuzkoako Foru Ogasunarekin harremanak euskaraz izan ditzaten gonbita egin diete.
Aurtengoan, Oiartzungo Landetxe eraikinaren ondoan egin dute agerraldia. Gogorarazi dutenez, ogasunak bidalitako autolikidazio proposamena euskaraz onar daiteke, baita Internet bidezkoa ere. Horrez gain, bulegoetan, mekanizatua egin nahi izanez gero, horretarako aukera badagoela berretsi dute.
“Errenta aitorpena euskaraz egitea urrats bat gehiago da ogasunarekin eta, azken batean, gure helburu izan behar duen administrazio publikoarekin harremana euskaraz izateko bidean”, adierazi dute. Gaineratu dutenez, “zorionez”, gero eta gehiago dira errenta aitorpena euskaraz egiten dutenak, baita ogasunarekin harremana dutenak ere.
Udalerri bakoitzeko ordezkari bana izan da. Iulen Odriozola Errenteriako Udaleko euskara zerbitzuko teknikaria izan bertan. Pasaiatik, Goizargi Oruesagasti euskara teknikaria.
Oiartzungo Udalarentzat lanean ari den Ttur-ttur elkarteko teknikari Aitzol Perez de San Roman ere bertan izan da. Hala nola, Lezoko Udalarentzat lanean ari den Ttakun elkarteko Maddi Etxebeste ere bai. Haiekin batera izan dira agerraldian Bikogest aholkularitza etxeko Marixabel Lasa eta Begoña Mendizabal.
Zozketa
Oarsoaldeko lau udalek, Oarsoaldeko Euskara Batzordearen bidez, bi lagunentzako otordu bana zozkatuko dituzte udalerri bakoitzeko. Errenta euskaraz egiten dutenen artean egingo dute zozketa.
Zozketan parte hartzeko hiru modu izango dira: Whatsapp bidez zabalduko duten drive bateko galdetegia osatuz, alde batetik. Bestetik, Oarsoarrak-en webgunean dagoen galdetegia ere bete ahal izango da. Azkenik, leku publikoetan egongo diren paperak ere bete daitezke.
