Kilometro baino gol are gehiago izan dira asteburuan Oiartzunen
Areto futboleko lehen taldeak bederatzi gol lortu ditu Elorsoron. Emakumeen talde nagusiak, berriz, beste dozena erdi bat, Ugaldetxon.
Ager Lekuon omendu zuten taldekideek, bere azkeneko partidan. Korrikak arrastoa utzi du asteburuan Oiartzunen. Ibilbide luzea egin dute: hamabi kilometro izan dira guztira haranean zehar egin dituenak. Ez da kopuru makala. Bada etxean jokatu duten Oiartzun Kirol Elkarteko bi taldeek kopuru hori gainditu ditu. Goletan, noski.
Ostiral arratsaldean, areto futboleko taldeak Laskorain Tolosako taldearen bisita jaso zuen Elorsoron. Partida berezia zen, Ager Lekuona atezainaren azkeneko partida izan baitzen Oiartzunekin.
Ongi bideratuta hasi zen, lehen zatia nahiko parekatua izan arren, oiartzuarrek asmatu baitzuten, hiru aldiz. Aldageletatik bueltan, urdinek bere zakua betetzen jarraitu zuten, beste bost gol sartuta. Tolosarrek ohorearen gola lortu ondoren etorri zen bederatzigarrena.
Miren Tabernak, Bigarren Mailan, Oarsoaldeko derbia jokatu zuen Beraunen, Gamonen kontra. Lehenengo zatia oso berdindua izan zen, baina oiartzuarrak aurreratu ziren azkeneko minutuan. Bigarren zatiko hirugarren minutuan iritsi zen bigarrena, eta oreretarrek aldea murriztu zuten azkeneko minutuan. Beste gol batentzako tartea izan zen, oiartzuarrena, hiru puntuak eramateko.
Nesken taldea, bikain
Emakumeen talde nagusia Ugaldetxon aritu zen, Salamancaren kontra. Oiartzuarrak bikain aritu ziren lehen zatian: baloia eurena izan zen, aukerak sortu zituzten, eta horietako batzuk gol bilakatu zituzten. Hiru, guztira.
Bigarren zatian, nahiz eta gol festa biribiltzeko hiru gol sartu zituzten, ez ziren lehenengoan bezain ongi aritu. Bi gol ere jaso zituzten. Rodak hat-trick bat sartu zuen, Lizasok beste bi eta beste Olaxarena izan zen. Kontuak kontu, hiru puntuak poltsikora eta postu bat gora (laugarrenera), Mulierrek galdu ondoren.
Gizonek, berriz, emaitza oso kaskarra ekarri zuten Beasaindik, azkeneko taldearen kontra. Partida hasi eta berehala aurreratu ziren etxekoak. Bigarren zatia oso ona izan zen, baina ezin izan zuten golik sartu.
Emakumeen 3. RFEF Maila
- Oiartzun — Salamanca: 6-2.
Gizonezkoen Ohorezko Erregional Maila
- Beasain B — Oiartzun: 1-0.
Emakumeen Euskal Liga
- Oiartzun B — Elorrio: 1-2.
Gizonen Lehen Erregionala. Kopa M-1.
- Oiartzun Bren liga apirilaren 14an bueltatuko da.
Emakumeen Ohorezko Erregional Maila
- Hernani B — Oiartzun C: 2-2.
Mutilen Gazte Mailako Euskal Liga
- Aretxabaleta — Oiartzun: 4-1.
Mutilen Gazte Mailako Gorengo Maila
- Oiartzun Bk atseden izan du asteburuan.
Mutilen Gazte Maila. Gipuzkoako Kopa: M1.
- Oiartzun C — Zarautz C: 2-3.
ARETO FUTBOLA
Gizonen Gipuzkoako Lehen Maila
- Oiartzun — Laskorain: 9-1.
Gizonen Gipuzkoako Bigarren Maila
- Gamon — Miren Taberna OKE: 1-3.
