Udalbatzaren ohiko osoko bilkurak bi mozio izango ditu
10 puntuko gai zerrenda izango dute bihar, eta publikoak saioa jarraitzeko aukera izango du. Hitzordua 18:30ean izango da.
Errenteriako Udalbatzaren ohiko osoko bilkura izango da bihar, eta saioan bederatzi puntu nagusi jorratuko dituzte; horien artean, bi mozio.
Orereta-Errenteriako EH Bildu eta Elkarrekin Errenteria, Podemos, Ezker Anitza eta Alianza Verde udal taldeek aurkeztutako mozioa izango da bata, hain zuzen Irun eta Brinkola arteko ADIFen trenbidea eta Renferen aldiriko zein distantzia erdiko zerbitzuak hobetzea helburua duena.
Beste mozioa, aldiz, herritarrena izango da, bandera Errepublikanoa Udaleko balkoian jartzea eskatzen duena.
Gai zerrenda
- 2024ko otsailaren 27ko ohiko bilkurari dagokion akta irakurtzea eta egokia bada onartzea.
- Alkatetzaren, Zinegotzi ordezkarien eta Tokiko Gobernu Batzordearen ebazpenen berri ematea.
- Kobratzeke dauden eskubideak aztertzea.
- Kredituak judizioz kanpo aitortzeko proposamena aztertzea.
- Serbitzu Elkartea S.L. enpresari agintzea Errenteriako kale garbiketa eta hiri hondakinak jaso eta garraiatzeko zerbitzua ematen jarraitzeko proposamena.
- Euskal Sozialistak taldeak Errenteriako kirol instalazioen etorkizunari buruz aurkeztutako interpelazioa.
- Euskal Sozialistak taldeak gaikako bilketari buruz aurkeztutako interpelazioak.
Gero, gai nagusiak landu ondoren, galdera eta eskarien txanda izango da. 18:30ean izango da saioa, eta publikoari irekia izango da, ondorioz, saioa streaming bidez jarraitzeko aukera izango da.
