Geuretik Sortuak egitasmoaren baitan ekoitzitako lanak, Oiartzunen
Egitasmoaren baitan ondutako hiru antzezlanak, film laburrak eta komikiak ikusteko aukera izango da Oiartzunen apiriletik urrira bitartean.
'Ütlandsk' filmaren grabazioa. Antzerkigintza, zinemagintza, komikia eta literatura diziplina artistikoko euskal sortzaileei egonaldi artistikoen bidez sorkuntzan laguntzea da Udalbiltzak martxan jarri duen egitasmoaren helburua; baina, baita Euskal Herriko herrien arteko sare bat sortzea ere.
Euskarazko kultur sorkuntza eta artisten mugikortasuna sustatzeko proiektuaren bigarren edizio honetan 39 udalerrik hartu dute parte; tartean, Oiartzunek. Pasa den urtean hainbat sortzailek sormen egonaldiak egin zituzten herri ezberdinetan, eta Geuretik Sortuak-en ekoitzitako hiru antzezlan, film laburrak eta komikiak Oiartzunen bertan ikusteko aukera egongo da apiriletik urrira bitartean.
Agenda
- Olagarrua antzerkia (Antzerki Aroak / Tipia). Apirilak 14, 19:00etan, Landetxe kultur aretoan. Sarrerak salgai daude dagoeneko.
- Eukalyptus antzerkia (Jon Ander Urresti). Maiatzak 12, 19:00etan, Landetxe Kultur Aretoan.
- Eraitsi S.L. antzerkia (Goitibera konpainia). Ekainak 16, kalean. Ordua zehazteke.
- Komiki erakusketa, irailaren 20tik 27ra, Udaletxeko areto nagusian. Iñaki Mattin Martiarena komikigileak aurkezpena egingo du 20an.
- Film laburren proiekzioa, urriaren 20an, Landetxe Kultur Aretoan. Alba Lozano zine zuzendariak aurkezpena egingo du.
- Ütlandsk film laburra (Alba Lozano), urriaren 20an.
Ütlandsk
Joan den udan grabatu zuen Lozanok filma, xanistebanetan. Suedian 6 urtez egon ondoren Oiartzunera itzuli den 24 urteko Estiren bizipenak ditu ardatz filmak.
Bere buruari jaioterrira itzuliko ez zela agindu bazion ere, ezegonkortasun ekonomikoak eta lan prekarietateak itzultzera behartu dute. Oiartzunera iritsi bezain laster Suediara bueltatzeko dirua biltzen hasiko da. Atzerrian egon den bitartean aldaketa esanguratsuak izan dituen arren, itzultzean herriak aldaezin jarraitzen duela konturatzen da, eta Esti ez dago egokitzeko prest.
