Martxan da Donibaneko Meipi auzoko lehen igogailua
Lezobide eta Bordalaborda kaleak lotzen dituen igogailua eginda, Bordalaborda eta San Roke lotzen dituen beste bat egingo dute.
Meipiko igogailua. Donibaneko Meipi auzoko lehen igogailua martxan jarrita, Meipiko irisgarritasuna hobetzeko planaren lehen fasea bukatutzat eman du Pasaiako Udalak. Igogailu honekin, hain zuzen, Lezobide eta Bordalaborda kaleak komunikatuta geratu dira. Hala ere, bigarren fase batean Bordalaborda eta San Roke kaleak igogailu berri baten bidez lotu nahi dituzte.
Astelehen arratsaldean jarri zuen martxan Pasaiako Udalak Meipi auzoko igogailua, eta Aintzane Taberna Ezkurra Donibaneko alkateordearen ustez aurrerapauso garrantzitsua izan da barrutiaren irisgarritasuna hobetzeko.
Lan horiek 475.465,12 euroko kostua izan dute. Orain, ordea, bigarren fasea egitea da asmoa, eta Udalak diru laguntza eskatu du obrarako. Hori ebatzi ondoren hasiko dira lanekin, baina aurreikuspena da lanekin urte honetan hastea.
