Hasi da 'Gazteon eskutik' ekimena, "amets bat egi bihurtzeko"
Gaurtik (hilak 29) hilaren 31era arte Ernai gazte antolakundeak antolatutako 'Gazteon eskutik' topagunearen lekuko izango da Lezo.
Argazkia: Ernai. Gaur goizeko 10:00etan hasi dira iristen lehen autobusak Ernai gazte antolakundeak antolatutako ‘Gazteon eskutik’ topagunera. Milaka gaztek gaurtik igandera bitarte hausnarketarako eta jairako espazioa izango dute Lezon. Akanpalekuan egokitu ondoren 11:00etan eman diote hasiera ofiziala ekimenari. Euria gogotik egin du, baina gazteak ondo prestatuta etorri dira eta Gurutze Santuaren plaza topetaraino bete dute.
Duela hogeita hamar urte antolatu zen lehen gazte topagunea. Ernaik lekukoa hartu eta gazte independentistak elkartzeko ekimenak antolatzearen erronkari eutsi zion. “Orain gu garelako protagonistak, hogeita hamar urte hauetan egindako lana gogoan dugu, baina gure neurrira egindako ekimena harilkatzen ari gara. Oraingo eta hemengo kezka eta hausnarketei erantzungo diena, gazteon eskutik etorriko baitira herri honetan aldaketa politikoak”. Aitortu dutenez “amets bat egi bihurtzeko”etorri dira Lezora, Euskal Herri aske, sozialista eta feminista izateko ametsa hain zuzen. Zentzu horretan, igandean Iruñeko Aberri Egunera joateko deia luzatu dute gazteek. Azkenik, topagunea gune seguru eta erosoa izan dadin Lezo ezagutzeko, herrikideak errespetatzeko eta elkar zaintzeko eskatu dute antolatzaileek. Ekitaldia amaitzeko txupina bota eta abesti ofiziala (Ganibet x Ziztada-ren Galdera guztiak) gogotsu dantzatu dute.
Segidan, Akeita gunera igo dira asko eta asko, tragoxka bat eratera eta zunba saioan parte hartzera. Beste hainbat Gatazka eta eraikuntza feministak zein Herrialde katalanetako ikasle greba aztergai hitzaldietara joan dira. Lehen hitzaldia Gezala Auditoriumean izan da eta Oihana Etxebarrietak (EHB), Uma Ulaziak (mugimendu feminista eta transmaribolloko kidea) eta Alaitz Uriartek (zaintza auziaren inguruko ikerlaria) eman dute. Bigarrena, Sindicat D’estudiants dels Paisos Catalans-ek eskaini du, ludotekan. Ondoren, 13:00etan hitzaldi tanda berri bati ekin diote: Aldaketaren errelatoa, Eraitz Saez de Egilaz (EHB), Beñat Jusue (Ernai) eta Asier Zamoranoren eskutik (Sortu) eta Komunikazio politikoaren inguruko hitzaldia.
