Kirol talde gehienek, jai
Udaberriko oporraldia luzatu dute kirol talde gehienek, eta asteburuan hiru jardunaldi baino ez dira izango
![](https://oarsoaldea.hitza.eus/site/files/2023/04/img-20230318-wa0009.jpg)
Partidarik ia ez da izango asteburuan. Talde gehien-gehienek udaberriko oporraldia luzatu eta ez dute jardunaldirik izango. Salbuespenak, futbolean eta eskubaloian. Touringen gizonen talde nagusiak, etxean izango du partida, eta zaleek animatzera joateko aitzakiarik ez dute izango. Zehaztu gabe dago partida eguna eta ordua.
Eskubaloian ere, talde nagusiak ariko dira lehian. Gizonezkoen Espainiako Lehen Mailan ari den Ereintza Aguaplast etxean ariko da, Galtzarabordan larunbatean 19:30ean hasita, Mek Eibar taldearen aurka. Horiek ere ikusi eta animatzeko aukera izango dute zaleek etxean bertan jokatuko baitute.
Emakumeen Zilarrezko Mailan partida bai, baina atzeratu egin du Ereintza Bitekek. Urkaberen kontra aritu behar zuten errenteriarrek, baina partida atzeratu eta ez dute zehaztu noiz jokatuko ote duten.
Kantxan ariko direnak jota su Gizonen Senior Mailako Euskadiko Ligan ari diren Ereintza Beissierreko jokalariak. Usurbilen izango dute partida azken horiek, larunbatean, 17:30ean hasita Saizar Usurbilen etxean.
Futbol txapelketa eta estropada Oiartzun ibaian
Talde gehientsuenek oporretan jarraitzen badute ere bi hitzordu garrantzitsu izango dira herrian asteburuan. Lehena bihar, Touring Kirol Elkarteak antolatu duen Haur eta Alebin Mailako Nesken futbol txapelketa. Horren gaineko informazio guztia, hemen klik eginda irakur daiteke.
Bigarrena, Hibaika Arraun elkarteak antolatu duen Xuxa Urkiaren Omenezko Estropada da. Igandean jokatuko da Oiartzun ibaian estropada hori, Gipuzkoako Batel Ligaren barruko 11. jardunaldia da, gainera. Arraun klubak marea beltza deitu du gerturatu eta etxeko arraunlariak animatzera. Gazte Mailako mutilen zein nesken ontziak lehia bizia dute lehen postua lortzeko eta une honetan Tolosaldearen ontzien atzetik daude bigarren sailkatuta taula orokorrean.
Hala ere, Hibaikako maila guztietako arraunlariek esker onez hartuko dute herritarren bultzada eta animoa, liga bukatzeko bi estropaden faltan—Oiartzun ibaian igandean jokatuko dutena, eta hilaren 13an San Pedron jokatuko dena—, puntuak poltsikoratu eta sailkapen taulan gora egiteko. Estropadaren gaineko informazio guztia, hemen klik eginda.