Gipuzkoako Batel Ligako 11. jardunaldia, Oiartzun ibaian
Gipuzkoako Batel Ligaren 11. jardunaldia jokatuko dute igandean; agertokia, Oiartzun ibaia izango da, Hibaika Arraun Elkartearen Xuxa Urkiaren omenezko estropadarekin.
Hibaikak antolatuta, Gipuzkoako Batel Ligako 9. jardunaldia jokatuko dute igandean Oiartzun ibaian. Xuxa Urkiaren omenezko estropada egingo dute Hibaika Arraun elkarteak antolatuta igandean, Oiartzun ibaian. Estropada hori, gainera, Gipuzkoako Batel Ligako 11. jardunaldia izango da, eta beraz, liga horretan parte hartzen ari diren Gipuzkoako arraun elkarteetako ontziekin jantziko da Oiartzun ibaiaren ibilgua eguerditik aurrera.
Kategoria guztiak ariko dira igandeko hitzordu horretan, haurrak, promesak, gazteak eta seniorrak, Oiartzun ibaian norgehiagoka. Estropada, 14:15ean hasiko da.
Errenteria-Oreretako arraun elkarteak herritar guztiak deitu ditu estropada bitartean Oiartzun ibaiaren bi aldeetara joan eta arraunaz gozatzera Hibaikako eskifaiak animatzen dituzten bitartean. Hibaikako Gazte Mailako Mutilen zein Nesken ontziak indartsu aterako diren zalantzarik ez da, ahal dela, lehen postuak lortzeko. Taularen goi goian ari dira bi ontzi horiek, nagusitasuna ezartzeko Tolosaldearekin lehia bizian. Haur eta Promesetan ere koska bat gora egiten saiatuko dira ligaren azken txanpan.
Igandeko jardunaldiaren ostean, asteburu gogorra izango dute jokoan batel ligan ari diren arraunlariek. Izan ere, hilaren 13an ligaren 12. jardunaldia jokatuko dute San Pedrok antolatuta Pasaiako Badian, eta egun bat geroago, berriz, hilaren 14an, Gipuzkoako Txapelketa, hori ere San Pedro Arraun Elkarteak antolatuta.
Lotura honetan sailkapen orokorra kontsulta daiteke.
