Black Irudi Faktoriaren hamargarrena ospatzeko, festa
De Cyne Reina tabernak hartuko du jai hori ostiralean —hilak 12— 20:30ean hasita. Bertan, Mendaroko Munlet taldea ariko da.
J.A Areta Goñi Juxe, bere laborategian. Juxe Areta Goñi argazkilariaren Black Irudi Faktoriak (Segundo Izpizua kalea, 6, 1.Lokala) hamar urte bete ditu. Hori horrela, urteurrena merezi moduan ospatzeko, jaia antolatu du argazkilari ezagunak. De Cyne Reina tabernak hartuko du jai hori ostiralean —hilak 12— 20:30ean hasita. Bertan, Mendaroko Munlet taldea ariko da. Munlet Plays Devo Akroneko (Ohio, Ameriketako Estatua Batuak) banda mitikoari omenaldia egiteko kaleratu zuen lana entzuteko aukera izango da.
Argazkilaria da Juxe Areta Goñi, ezaguna oso Errenteria-Oreretan baita hortik gaindi ere. 1993an haren amak argazki kamara bat oparitu, eta ordutik hasi zen oreretarra argazkiak egiten, eta horietako bakoitzean istorioak kontatzen. Prestaketaren bat jaso badu ere, autodidakta izan da oro har, bere kabuz ikasi du eta ikasten jarraitzen du argazkilaritzaren inguruan dakien guzti-guztia, asko dena.
1993tik 2000 urtera arte egunero-egunero laborategi batera joaten zen positibatzera. Orduan erabaki zuen, ikaragarri gustuko zuela-eta bere laborategia zabaltzea, argazkilaritzarekin liluratuta; garai batean, aitonaren ukuilua izandakoan zabaldu zuen laborategia argazkilariak, eta 2014an zabaldu zuen argazki estudioa, Black Irudi Faktoria. Bertan estudioko argazkiak, galeria lanak, ikastaroak eta lantegiak eskaintzen ditu argazkilariak; neurri eta euskarri ezberdinetan landutako argazki batzuk ere baditu salgai.
Argazkilaritzaren zale amorratua eta musikazale apasionatua. Kontzertu bat non, han dira Juxe eta bere kamara. Kontzertuak erretratatzea erabaki zuen une batean bere bi pasioak batuz. Argazkiekin kontatzea bilatzen du, indarra islatzea.
Musikaz gain, bidaiak, paisaiak, jendeak erretratatzen ditu , eta bere lanak erakusketetara eraman; 50etik gora egin ditu, eta ez ditu argazkiak errepikatzen. 1996an antolatu zuen lehena Añorgako zineman.
Juxe eta argazkilaritza bat dira, bizitzeko, bizitza ulertzeko, eta pasio duen lanbidearen bidez bizitza bera erakusteko modu bat.
