Zaharren egoitzen egoera "jasanezinaren" aurrean, batzarra
Sanmarkosene eta Jesusen Bihotza zaharren egoitzetako erabiltzaileen senideek eta Duintasunak egoera salatu dute, eta egoera hobetzeko mobilizazioak iragarri dituzte.
Herriko bi egoitzen egoera "jasanezina" dela salatu dute. Jasanezina. Hala definitu du Duintasuna pentsiodunen elkarteak eta herriko bi zaharren egoitzetako erabiltzaileen hainbat senideek adinekoen erresidentzietako egoera. Besteak beste, tratu eskasa, langile gutxiegi eta baldintza eskasak. Horiek dira egin duten erradiografiaren ondorio nagusiak. Egoera jasanezinaren arrazoia ere eman dute, ez dute zalantzarik eta “pribatizazio” eredu baten ondorioa dela gaur egun Sanmarkosene eta Jesusen Bihotza zaharren egoitzetako erabiltzaileek pairatzen duten egoera.
Hori horrela, ezinbesteko jo dute baldintzak hobetuko dituen bideari ekitea. Argi esan dute: “Gure egoitzetako eguneroko bizimodua hobetzeko borrokatzen hasteko garaia da”.
Lehen urratsa bide horretan, hilaren 10ean, asteazkena, 18:30ean Xenpelar Etxean egingo duten batzar irekia da. Deialdiaren atzean, Duintasuna pentsiodunen elkartea, eta bi erresidentzietako erabiltzaileen hainbat senide. Hala ere, argi dute borroka zabaldu beharra dagoela eta orain arte hasitako lanketa eta borrokaldi guztietan bezalaxe herriko eragileak deitu dituzte bat egitera. Hartara, mugimendu feminista, egoitzetako langile eta erabiltzaileen senideei dei egin diete bertaratzera, baita herritarrei ere.
Batzar horretan, egoitzen egoera mahai gainean jarri eta egin daitezkeen mobilizazioak aztertuko dituzte.
