Allende Arnaizen 'Birsortu' erakusketa, 21 Aulkiren ardatza
Erakusketa Ehuntze espazioan izango da ikusgai, hilaren 14tik 27ra bitartean. Horrekin batera beste hainbat ekitaldi antolatu dituzte.
Iztietako garaje baten patroia erabili du Arnaizek, Ehuntze Metrokoadroka kolektiboak 2018an antolatu zuen estreinakoz 21 Aulki izeneko zikloa. Ordutik hainbat sortzaile eta artistaren aterpe eta agertoki izan da, eta hainbat diziplinarekin gozatzeko aukera izan da.
Aurtengoan, Allende Arnaiz artista oiartzuarraren instalazio bat izango da 21 Aulkiren ardatza. Birsortu izeneko erakusketa ikus ahal izango da hilaren 14tik (datorren igandea) 27ra.
Erakusketa horretan, Arnaizek natura eta hirian ematen diren antzeko prozesuak jarri nahi izan ditu aurrez aurre. Basoaren birsortzea eta langileen auzoen arteko antzekotasunak eramango ditu Ehuntzera, serigrafia eta argazki dokumentu bidezko instalazioaren bitartez.
Horretarako, egileak erakusketaren parte den Laharrak eta belarrak serieko serigrafiak Iztieta auzoko garaje batekoekin jarri ditu aurrez-aurre.
Modu berean, Arnaizek Errenteria-Oreretako Iztieta auzoan abandonatuta dauden auto konponketa garajeen ateen estetika erabiliz eta hauen irudiak serigrafia bidez manipulatuz, begi bistan jarri nahi da auzoaren eraldatze prozesua. Lehengo komertzioak berriengatik ordezkatzen ari direla islatu nahi izan du: kebabak, yoga zentroak, halalak…
Bi elementuak bere testuingurutik atera eta manipulatuz, Arnaizek beren izaera eraldatzaileari garrantzia eman nahi izan die. Garaje bateko atearen zati batekin patroi bat egin du, errepikapenaren bidez irudi geometriko ezberdinak sortuz. Patroi hau hainbat alditan estanpatu ondoren Ehuntzen ikusi ahal izango den instalazioa izan da emaitza, eta erakusketara hurbiltzen denak bere konposizio propioa osa dezake.
Ekitaldiak
Erakusketarekin batera, saio osagarriak eskainiko dituzte oraingoan ere, iaz Onintza Etxebesteren erakusketarekin egin bezala. Gainera, 21 Aulki-ri lotuta, Metrokoadrokak Artemugarri izeneko artista liburu bilduma bat jarri du martxan. Igandean bertan aurkeztuko dute, erakusketaren inaugurazio ekitaldian.
Honakoa izango da, beraz, hilaren 14ko arratsaldeko egitaraua:
- Erakusketa: hilaren 14tik 27ra.
- Ordutegia: astelehenetik ostiralera 17:00etatik 19:30era, larunbatetan 11:00etatik 13:30era.
- Inaugurazio ekitaldia eta liburu aurkezpena: hilaren 14an, 17:30etik aurrera.
- Solasaldi tailerra: hilaren 19an, Ula Iruretagoienak gidatua, 18:00etatik aurrera.
- Tailerra eta ekintza artistiko efimeroa: Oiartzungo espazio bat eraldatzeko xedea izango du herritarrekin, hilaren 26an. Izen ematea eta informazioa, Ehuntzera e-posta bidez idatzita.
