Energia-aholkularitza zerbitzua jasotzeko aukera izango dute oiartzuarrek
Oarsoaldeko Energia Bulegoak zerbitzu "integrala" emango du astelehenetan, Mendiburu kaleko 3 zenbakian. Udalarekin elkarlanean arituko dira.
Xabier Sesma Korta, Oarsoaldeako Jasangarritasun teknikaria eta Ibon Mitxelena Fernandez, Ekonomia Sozialerako zinegotzia. Datorren astelehenetik aurrera —hilak 15—, oiartzuarrek energia-aholkularitza zerbitzu “integrala” jaso ahal izango dute Oarsoaldeko Energia Bulegoaren eskutik. Oiartzungo Udalarekin elkarlanean, zerbitzu hori astelehenetan jaso ahal izango dute oiartzuarrek, Mendiburu kaleko 3 zenbakiko lokalean.
Hainbat gairi buruzko informazioa eskainiko dute bulegoan. Honakoak izango dira tartean:
-
Fakturak interpretatzea eta energia-kontsumoa aztertzea.
-
Energia tarifei eta eskura dauden laguntza ekonomikoei buruzko informazioa.
-
Etxebizitzen energia-eraginkortasunari eta berriztagarriei buruzko aholkularitza.
-
Energia alorreko legediaren eta komunitateko ekimenei buruzko eguneratzeak.
Txanda hartuta
Oarsoaldeko Energia Bulegoko teknikariek aholkularitza “zuzena” eta “pertsonalizatua” emango dute. Astelehenero 09:00etatik 14:00etara eta 14:30etik 16:00etara izango da.
Hitzordua hartu beharko dela jakinarazi dute, hori bai, 943 344 160 telefono zenbakira deituta edo e-posta bidez idatzita.
Erakundeen arteko elkarlana
Adierazi dutenez, Oarsoaldeko Energia Bulegoko langilea Oiartzungo Udalarekin arituko da elkarlanean, zerbitzua herrian “modu eraginkorrean” emateko. “Modu honetara, Argitturri, Oiartzungo Energia Berriztagarrien komunitateak egindako eskaerari erantzunez”, argitu dute.
Oarsoaldea Garapen Agentziak —energia bulegoa horren eskumenekoa da— eta Oiartzungo Udalak oiartzuarrak animatu dituzte, zerbitzua erabil dezaten. “Informazioa, orientazioa eta laguntza emango zaie energiarekin lotutako gaietan, fakturak interpretatzetik hasi eta energia-eraginkortasunari eta berriztagarriei buruzko aholkularitzaraino”, berretsi dute.
Nabarmendu dutenez, zerbitzuak erabaki “informaziodunagoak” hartzen lagunduko du, baina baita etxebizitzen “ongizatean” eta ingurumenaren zaintzan eragina izango du.
