Itsas hondakinak arrantzatuko dituzte Mater ontzian
Larunbat goizean irtengo dira herritarrak San Pedroko portutik. Doakoa izango da irteera, baina izena eman beharko da aurretik.
Itsasoa kutsatzen duten hondakinak biltzeko irteera berezia antolatu du Mater Ontzi Museo Ekoaktiboak larunbaterako (hilak 13). Mater ontzian nabigatuz hondakinak jasotzen ariko dira hala nahi duten herritarrak. Jaizkibelgo itsaslabarretatik hasi eta itsaso zabaleraino eramango dituzte garbiketa lanak.
Doakoa izango da irteera, baina aldez aurretik izena eman beharko da. 11:00etan hasi eta 13:30ak inguruan bukatzea aurreikusi dute. Izena emateko 619 81 42 25 telefono zenbakira deitu behar da, edo bestela, helbide honetara idatzi.
Arratsaldean, berriz, “Jaizkibelgo itsaslabarren handitasuna miresteko” aukera emango dute, kasu honetan ere Mater ontzitik. 16:00etatik 17:30era izango da txangoa. Helduek 30 euro ordaindu beharko dituzte, eta 12 urtetik beherakoek, aldiz, 15.
