Geuretik Sortuak-eko uzta den 'Olagarrua' antzezlana, igandean
Antzerki Aroak / Ttipia taldeak sortutako antzezlana ikusi ahal izango da Landetxen. Udalbiltzaren laguntzaren babesean findu dute obra hori.
Maitane Perez, Nerea Arriola eta Olatz Beobidek sortu dute antzezlana. Udalbiltzak Geuretik Sortuak izeneko egitasmoa martxan jarri zuen duela urte batzuk. Artista edota sortzaileentzako egonaldiak eskaini zituzten, beraien lanak fintzeko. Ondoren, sortutakoa herrietan erakustea da helburua.
Olagarrua antzezlana da iaz ereindakoaren uztako ale bat. Oiartzunen egitasmoaren barruan sortutako bost lan erakutsiko dituzte, eta hori izango da egitarauko lehenengoa (egitarau osoa hemen kontsulta daiteke).
Datorren igandean taularatuko dute Oiartzunen, Landetxe aretoan, 19:00etan hasita. Sarrerak eskuragarri daude, 8 euroan.
Antzerki Aroak / Ttipiako Olatz Beobide, Nerea Arriola eta Maitane Perez aktoreek eurek sortu dute antzezlana. Zumaian egindako egonaldian findu zuten obra.
Sinopsia
Errudunak gara?
Errugabeak?
Zerk egiten gaitu errudun? edo nork?
Gure errua, gure errua da?
Ba al daude erru txiki eta handiak?
Erru kuttunak askatu nahi ditugu?
Erru potoloak kiloka neurtu daitezke?
Oholtza bat. Olagarru bat. Hiru emakume.
Hiru bihotz erruarekin jolasean, olagarroaren eta gizakien munduak nahastuz, erroak eta erruak
korapilatuz, itsas azpian eta lur gainean biziraun nahian. Hiru aktore erruak astindu nahian,
olagarroak haren zortzi erroak astintzen dituen moduan.
Obra posible asko obra bakar batean, poetika ezberdinetan mimetizatuko direnak, zuloetan sartuko
direnak, barrearen bidez arnasa ekarriko dutenak eta behar izanez gero tinta beltza jaurtiko
dutenak, bizirauteko.
Oholtza bat. Olagarro bat. Hiru emakume. Eta askoz gehiago.
Fitxa teknikoa
- Sortzaileak: Olatz Beobide, Maitane Perez eta Nerea Arriola.
- Kanpo-begirada: Iraia Elias eta Amancay Gaztañaga.
- Ekoizpena: Antzerki Aroak eta Ttipia.
- Dramaturgia: Talde sorkuntza; dramaturgia: Maialen Diaz.
- Aktoreak: Olatz Beobide, Maitane Perez eta Nerea Arriola.
- Musika: Pascal Gaigne.
- Espazio eszenikoa: Natalia Hickney.
- Jantzitegia: Nati Ortiz de Zarate.
- Irudia eta diseinua: Iurre Aranburu.
- Argi diseinua: Harkaitz Garralda.
