Pasaiako mugei buruz ariko da Txema Ruiz idazle eta historialaria
Lau barrutietan izango da antxotarra, 'Las difíciles relaciones de las comunidades de la Bahia pasaitarra con Donostia' liburuan jasotako datuak eta esperientziak elkarbanatzen.
Ezkerretik eskuinera, Xabier Baztarrika, Aitziber Zinkunegi, Txema Ruiz, Aitor Brion eta Pedro Mari Perez. Txema Ruiz idazle eta historialari antxotarrak hitzaldi interesgarriak eskainiko ditu datozen asteotan Pasaian, ostegunean izango da lehena. Lau barrutietan izango da antxotarra, Las difíciles relaciones de las comunidades de la Bahia pasaitarra con Donostia liburuan jasotako datuak eta esperientziak elkarbanatuko ditu pasaitarrekin. Duela hilabete batzuk kaleratu zuen ikerketa eta dokumentazio lan hau Ruizek, eta honetan bi udalerrien arteko mugei buruz aritu da, historikoki izan diren liskarrak kontatuz.
Hitzaldi sorta aurkezteko agerraldia egin dute gaur. Bertan, Txema Ruiz bera, Aitor Brion zinegotzia, Pasaiako liburutegietako koordinatzaile Aitziber Zinkunegi eta Ruizen lagun Xabier Baztarrika eta Pedro Mari Perez izan dira.
Idazle eta historialaria hunkituta agertu da udalak egindako proposamenarekin, sorterrian aurkeztu ahal izatea “ohore” bat dela adierazi du: “Gai horrek polemika handia sortu du eta ezjakintasun handia dago”, adierazi du gaurko agerraldian.
Brion zinegotziaren arabera, “Pasaia eta Donostiaren historia markatu duten harreman konplexuetan” murgildu da antxotarra argitalpen honetan, “portuaren kudeaketatik hasi eta mugei buruzko tentsioetaraino. Idazlearen hurbiltasunagatik eta dibulgazio estiloagatik, kontatzen duen historiak bizitza hartzen du gure begien aurrean. Gainera, zorroztasun historikoa umore eta ironia ukituarekin uztartzen du, eta horrek hitzaldi hauek are interesgarriagoak egingo ditu”, esan du.
Hitzaldi hauetan badiako komunitateen sorrera, Donostiarekin izandako ika-mikak eta beste hainbat gaiez ariko da. Hitzaldiak biribiltzeko, hitzaldian zehar argazkiak erakutsiko dituztela aurreratu dute, Antxotarrok Historia Mintegia Fototekan bildutakoak.
Jarraian hitzaldien informazio guztia:
- Hilak 11 (osteguna): San Pedroko liburutegian, 19:00etan.
- Hilak 16 (asteartea): Donibaneko Kulturguneko erabilera anitzeko aretoan, 19:00etan.
- Hilak 24 (asteazkena): Antxoko liburutegian, 19:00etan.
- Hilak 29 (astelehena): Trintxerpeko liburutegian, 19:00etan.
