Madalensoro aparkalekuko lau plaza alokatzeko, zozketa
Aparkaleku publikoak 47 toki ditu herritarrentzako. Horietako lau libre geratu dira; hilaren 25era arte eman daiteke izena zozketan.
109 toki daude, guztira, Madalensoron. Oiartzungo Udalak adierazi duenez, Madalensoro pilotalekuaren azpiko aparkalekuan lau toki libre geratu dira. Horiek alokatu nahi dituztenentzako prozesua abiaraziko duela jakinarazi dute.
Aparkaleku horretan 109 toki daude. 62 edozein herritarrek erabiltzeko moduan daude, eta gainontzeko 47ak hamar urterako esleituta daude, 2019tik. Horietako lau libre geratu dira; zehazki 28, 39, 46 eta 47 zenbakia dutenak.
Toki horiek zozkatuko dituzte, eta interesa dutenek hilaren 11tik —bihar, osteguna— 25era bitartean eman beharko dute izena. Horretarako udaletxetik pasa daiteke, edo egoitza elektronikoaren bidez izena eman.
Esleipena, ia 2029ra arte
Zozkatuko dituzten tokiak 2028ko abenduaren 31ra arteko esleipena izango dute. Hala ere, esleipendunek edozein momentutan uko egin diezaiokete garaje plaza horri. Hilean 50,44 euroko prezioa dute.
Garaje plaza guztiak irekiak dira, lurzoruan margotutako marrek mugatuak. Bakoitzak, gutxi gorabehera, 13,475 metro koadroko azalera du. Zozkatuko dituzten lau toki horietatik hiruk desgaitasunen bat duten pertsonak garraiatzen dituzten ibilgailuentzat egokituta daude.
Eskaera orriarekin batera, ardurapeko adierazpena eta gehien interesatzen zaien plazen hurrenkera zehazten duten dokumentua aurkeztu beharko dute interesdunek.
Hori bai, esleipena jasoko ez dutenen artean itxaron-zerrenda osatuko dutela jakinarazi du udalak. Aurrerago tokiren bat libre geratuko balitz, haiek izango dute lehentasuna.
Xehetasunak eta aurkeztu beharreko dokumentuak Oiartzungo Udalaren webguneko Iragarki Taulan ikus daitezke.
