Nerabe migratuen bidaia Europan zehar, Landetxeko pantailan
'Shadow Game' filma emango dute ostegun arratsaldean. No Name Kitchen elkarteko Naroa Zabaleta oiartzuarrarekin solasaldia egingo dute ere.
Hammoudi 14 urteko gazte siriarra da gazte migratzaileetako bat. Irudian, Bosnia-Herzegovinan, Gabonetako argiak atzean dituela. Ostegunak zinema egunak izaten dira Oiartzunen, eta biharkoa ere hala izango da. Shadow Game dokumentala proiektatuko dute Landetxeko pantailan. 19:30ean hasiko da emanaldia.
Eefje Blankevoort eta Els van Driel zuzendari herbeheretarrek Europara iritsi nahi duten gazte migratzaileak jarraitzen dituzte. Gerren edota miseriarengandik ihes egiten dute gazte horiek, eta bizitza jokoan jartzen dute Europara iristeko.
Siria, Darfur edota Afganistandik ihes egiten dute, baina Europak duen migrazio politikak ez die muga gurutzatzen uzten. Besteak beste, Genevako (Suitza) Giza Eskubideei buruzko Zinema Jaialdian saria jaso zuen.
Sarrerak salgai daude, online, 3 euroan. Emanaldiaren ondoren hitzaldia izango da, Naroa Zabaleta oiartzuarrarekin. No Name Kitchen elkarteko kidea da.
