Arragua biziberritzeko prozesua abiaraziko dute
Auzoan etxebizitzak eta ekipamenduak egiteko proiektua du Oiartzungo Udalak. Auzotarrekin marraztu nahi dute etorkizuna.
Arragua biziberritzeko prozesua abiaraziko du Oiartzungo Udalak. Nabarmendu dute auzo bakoitzak duela bere nortasuna, are gehiago Oiartzunen. “Eta orain, Altzibarren egin zen bezala, Arragua biziberritzeko unea da. Arragua bizia, erosoa, irisgarria, koloretsua, herriari lotua, auzotarren beharretara egina”, iragarri dute.
Azpiegitura berriak egingo dituzte auzoan, “elkarbizitza eta zaintza erraztuko dituen” kalitatezko espazio publikoekin. “Etxe gehiago eta aisialdirako gune eta plaza berriak gehituko zaizkio oraingo auzoari, beti izan duen izaera eta nortasuna indartzeko”, esan du udalak.
Arraguan bizi direnen eta bizitzera joango direnen bizi-kalitatea “erdigunean” jarri nahi duela adierazi du Oiartzungo Udalak. Udalak honako gaietan jarri nahi du fokua:
- Auzoko kale-bizitza sendotu eta zerbitzu berriak ekarriko dituen hazkundea.
- Oiartzuar gazteen etxebizitza beharrei egokitutako etxebizitza babestua sustatuz. Etxebizitzen erdia baino gehiago izango da babestua.
- Auzoa konektatuz: oinez, bizikletaz, autobusez eta trenez.
- Eremu natural askotarikoak sortuaz, haurren gozamenerako eta helduen mugimendurako.
390 etxe…
Arraguaren biziberritze integrala diseinatzeak aspaldi du jatorria. Izan ere, 2006an 600 etxebizitza proiektatu zituen orduko udal gobernuak. Gerora gobernuan egon diren udal taldeek gehiegizkoa iritzi zioten, eta, negoziazioen ondoren, 390era murriztuko dira eraikiko den etxebizitza kopurua. Horien erdia pasatxo, babestutakoak izango dira.
Oiartzuarrek izango dute lehentasuna, jakinarazi dutenez. Hiru logelakoak, bikoak eta bakarrekoak izango dira, herritarren beharrak asetzeko.
Babestutako etxeen kopuru handiena babestutakoak izatearen arrazoia azaldu du udalak: “Gaur egun etxebizitza erosteko herritarrek finantzazio mugekin egiten dute topo eta, ondorioz, ezinbestean bada ere, alokairua da emantzipaziorako eta bizitza proiektuak garatzeko aukera erreala”.
…eta hainbat ekipamendu
Hala ere, etxebizitzak bakarrik ez, beste hainbat ekipamendu ezarri nahi ditu udalak, etxeetara ez mugatzeko. Etxeetako atarietan 3.000 metro koadro erreserbatuko dituzte: denda, taberna, udal zerbitzuak, auzo lokala… Kanpoan 8.000 metro bideratuko dituzte parke eta berdeguneetara.
Eremu horien erabilera auzotarrekin eta gainontzeko oiartzuarrekin zehaztu nahi du udalak, «auzo bizigarri eta erakargarria» egiteko, guztien neurri eta beharretara egokitua, parte-hartze saioetatik abiatuta.
Bilerak
Oiartzungo Udalak bina bilera egingo ditu arraguarrekin, alde batetik, eta gainontzeko oiartzuarrekin, bestetik. Lehenak hilaren 17an (Arraguako frontoi ondoko lokalean) eta 18an (udaletxean) izango dira, proiektua aurkeztu eta «etorkizuna irudikatzen hasteko». Bigarrenak hilaren 24an (Arraguan) eta 25ean izango dira, espazio berde eta plazen nolakotasuna, eta auzoak behar dituen zerbitzuak lantzeko.
Arraguan eta Elizalden egingo diren ariketak berdinak izango dira. Udalak herritar guztiei eman nahi die auzoa biziberritzeko proposamenak egiteko aukera. Saio guztiak 18:30ean izango dira eta zuzeneko itzulpen zerbitzua egongo da.
