EH Bilduk eta EAJk "erasotzat" jo dituzte euskararen kontrako bi epaiak
Irakurketa bateratua atera dute bi alderdiek. Adierazi dutenez, epai horiek "ez dute aintzat hartzen euskararen eta gaztelaniaren bizikidetza errazteko azken 40 urteetan garatu den legegintza prozesua, ez eta administrazioak egin duen bidea ere".
Donostiako Administrazioarekiko Auzien 2. eta 3. zenbakiko epaitegiek euskararen kontra egin berri dituzten bi epaiak salatzeko irakurketa bateratua atera dute udaleko EH Bildu eta EAJ taldeek. Biek “erasotzat” jo dituzte bi sententziak, “hizkuntza eskubideak zalantzan” jartzen baitituzte haien hitzetan.
Adierazi dutenez, epai horiek “ez dute aintzat hartzen euskararen eta gaztelaniaren bizikidetza errazteko azken 40 urteetan Euskadin garatu den legegintza prozesua, ez eta administrazioak egin duen bidea ere”. Oinarriko lege horrek garapena izan duela erantsi dute, hainbat dekretu eta arauren bidez. Hauek “euskararen normalizazioan aurrea egiteko ezinbestekoak” izan direla diote, “eta etorkizun hurbilean jarraitu beharreko bidea dugu hori. Zergatik da diskriminatzailea gutxieneko euskara maila bat eskatzea? Udaleko langile guzti-guztiek ordezkatzen dute udala, kalean dabiltzanek nahiz bulegoetan dihardutenek. Guztiak dira udalaren ispilu”, diote, amorruz. Hortaz, eskubide hori muga edo trabarik gabe betetzen dela ziurtatzea herri langileen betebeharra dela erantsi dute: “ez da langilearen eskubideen defentsa egitea, gizartearen eskubideak ez urratzea baizik”.
Auzitegiak hizkuntza politiketan “eragile aktibo” bihurtzen ari dela esan dute bi taldeek, “hizkuntzaren planifikazioa errotik mugatuz”, eta udalaren “autonomiaren kontra” jotzen ari direla. “Euskara biziberritzeko politikak erabat mugatzen dira, administrazioan euskara gaztelaniaren makuluarekin soilik erabili behar dela iradokiz. Horrek urte askotan atzera egitea dakar. Halaber, lanpostuei euskararen hizkuntza eskakizuna ezabatzea zerbitzu publikoen kalitatea murriztea eta erantzukizun sozialari jaramonik ez egitea da”, esan dute. Beraz, herritar guztien eskubideak bermatzeko bide bakarra langile publikoek euskararen ezagutza izatea dela erantsi dute hiru taldeek.
Bukatzeko, aurreratu dute euskararen mailaren ezagutza kentzeko emandako epaien kontrako helegitea aurkeztuko duela. Era berean, honakoa eskatu dute (hitzez hitz): Ez urratzea udalarekin euskaraz komunikatu nahi duten pasaitarren eskubideak eta ez hartzea Pasaiako euskararen normalizazio prozesuan atzerapausoa eragin dezakeen inongo erabakirik; Errespetatzea udalaren autonomia, zehazki, udal baliabideak eta zerbitzuak pasaitarren beharren arabera antolatzeko eta egokitzeko eskumen eta betebeharra; eta herritarrei dei egin diete Euskalgintzaren Kontseiluak eta Bokale Pasaiako Euskararen Aholku Batzordeak deitu duten elkarretaratzean parte hartzera.
