"Euskaraz lan egiteko eta bizitzeko dugun eskubidearen aurkako oldarraldirik ez dugu onartuko"
Elkarretaratzea egin dute gaur Pasaiako Udaleko langileek, euskararen kontrako azken bi sententziak salatzeko. Udalari "errekurtsoa jartzeko eta egonkortze prozesuarekin aurrera egiteko" eskatu diote.
Euskararen aurkako azken erasoari irmoki erantzun diote gaur Pasaiako udal langileek. Pasaiako Langileen Batzordeak deituta, elkarretaratzea egin dute gaur eguerdian udaletxe parean, Oldarraldiaren aurrean, euskararekin bat, euskaraz bat lemapean. Bertan salatu dute Donostiako Administrazioarekiko Auzien 2. eta 3. epaitegiek eman berri dituzten bi sententziak. Hauen arabera, udalak 2023an egindako kale garbitzaileen lanpostuak egonkortzeko deialdian gutxieneko euskara mailaren eskakizuna baliorik gabe utzi dute. Hain zuen, 2015ean hamabost lanpostutarako euskarazko B1 maila izatea jarri zuten baldintza gisa eta eskaera hori “diskriminatzailea” dela diote bi sententziek, “argudiatzen baitu urratu egiten dela lanpostu publikoetara baldintza beretan iristeko oinarrizko eskubidea”.
“Euskal langileok Euskal Herrian euskaraz lan egiteko eta bizitzeko dugun eskubidearen aurkako oldarraldirik ez dugu onartuko, lanerako dugun eskubidea eta gure herrian euskaraz bizitzeko duguna ez baitira kontrajarriak, osagarriak baizik. Ez dugu ontzat emango Pasaiako Udalean kale garbitzaile lanpostuetan gutxieneko euskara mailaren ezagutza kentzeko kaleratu diren ebazpen judizialak”, esan dute lehenik
Udaleko langile “guzti-guztiek” ordezkatzen dutela erantsi dute, “kalean dabiltzanek nahiz bulegoetan dihardutenek. Guztiak dira udalaren ispilu”. Herritar guztiek herri administrazioarekin nahi duten hizkuntza ofizialean harremanak izateko eskubidea dutela esan dute, eta “ezinbestean”, beraz, “herri langileen betebeharra dela eskubide hori muga edo trabarik gabe betetzen dela ziurtatzea”.
Udalak erakundea bera zein udalerria euskalduntzeko planak bideratzen urteak daramatzala esan dute, eta horretarako, langileei dagokien hizkuntza eskakizuna lortzeko baliabideak eskaintzen. “Hortaz, lege arloan ez dugu ulertzen azken 40 urteotan indarrean egon den Euskara Legea, eta lege hori garatzeko dekretu guztiak normaltasunez bideratu direnean, horiek aldatu gabe orain sekulako oldarraldi juridikoan murgildu izana. Legeak onartu badira, zergatik jotzen dute epaileek lege horien kontra? Ez al dira ba gehiengo zabal batez onartu? Zer aldatu da?. Ondorio linguistikoak dituen inboluzio politiko zabalagoaren baitan dago erantzuna. Erabat antidemokratikoa da, euskaraz lan egiteko eta bizitzeko eskubidea zapuztea legaltzat jotzen bada ere”, adierazi dute, amorruz.
Eskaerak
Guzti hori kontuan hartuta, lehenik eta behin, Pasaiako Udalari “errekurtsoa jartzeko eta egonkortze prozesuarekin aurrera egiteko” eskatu diote, “lanpostuen zerrendan onartutakoa errespetatuz”. Horri lotuta, euskara maila hobetzeko udal langileek beharrezkoak dituzten baliabideak ematen jarraitzeko ere eskatu diote erakundeari.
Bigarrenik, euskal klase politikoari dei egin diote, “horrelako oldarraldia ekidin dezakeen bidea eta akordio politikoa jorra dezan, horretarako legea egokituz, alegia, Euskararen Legea sendotuz”.
Euskal jendarteari ere dei egin diote, “oldarraldiari aurre egiteko”, eta besteak beste, “euskaraz bizitzeko autua egin dezan, euskara nonahi harrotasunez erabiliz”.
Langileei “euskararen alde ager daitezen” eskatu diete, lan mundua euskalduntzeko prozesuan “indar erabakitzaileak” izan daitezen.
Azkenik, bihar (hilak 12) Antxoko Biteri plazan egingo duten elkarretaratzera joateko deia egin diete pasaitarrei. 18:30ean bilduko dira, Kontseiluak eta Bokale Pasaiako Euskararen Aholku Batzordeak deituta.
